Ish-lojtari i akademisë së Liverpulit, Tom Bruit, ka pranuar se ai ka dëmtuar qëllimisht një shok skuadre për të fituar një vend në skuadrën e parë të Klopit.

Bruit, i cili sezonin e shkuar luajti për Morkamb përpara se të lihej i lirë këtë verë, thotë se ai ishte i dëshpëruar për të debutuar me “Reds”-at, pasi ekipi i parë kishte një krizë dëmtimesh gjatë sezonit 2015-’16. Klop ishte në sezonin e tij të parë në “Anfield” dhe do të hidhte sytë nga ekipi i të rinjve.

Por, për t’u grumbulluar nga trajneri gjerman, Bruit kishte konkurrencën e mbrojtësit Daniel Kliri. “Do ta bëja me çdo kusht. Edhe nëse do të dëmtonte dikë apo do të prishja marrëdhënien që kisha me shokun, unë e kisha vendosur. Isha i dëshpëruar për të luajtur me Liverpulin, – tregon kapiteni i “Reds”-ave në “FA Youth Cup”. – Jyrgen e dinte që kishte një krizë dëmtimesh dhe ai do të luante me Hoze Enriken në qendër të mbrojtjes dhe do të rikthente Tiago Ijorin nga huazimi.

Nuk e dinim këtë deri në javën e parë të janarit, kështu që deri në dhjetor ose unë, ose Den Kliri, i cili sipas meje ishte i zgjedhuri, do të debutonim me ekipin e parë. Unë dhe Den shkonim shumë mirë, për të thënë të vërtetën, por unë i dhashë fund asaj shoqërie. E vendosa dhe gjatë ndeshjeve të dhjetorit iu vura pas në stërvitje për ta dëmtuar. Nuk doja ta dëmtoja rëndë, por mjaftueshëm sa për të më hapur vendin.

Një javë përpara ndeshjes me Ekseterin i ndërhyra ashpër. E bëra me qëllim dhe nuk jam krenar. Më vjen turp. Pati një sherr pas saj. Për reagimin e tij të ashpër ai u dërgua në dushe. Për dy javë ishte me paterica”. Por karma vendosi drejtësinë, me Bruitin, i cili pak ditë më vonë pësoi një lëndim në kokë që e la jashtë ndeshjes me Ekseterin. Dhe ëndrra e tij përfundoi aty. Ai nuk luajti kurrë për ekipin e parë të Liverpulit.

PANORAMASPORT.AL

NDIQE LIVE "PANORAMA TV"

---