Leonardo Bonuçi ka lëshuar sot një tjetër thumbim që kishte si objektiv ish-trajnerin e tij, Masimiliano Alegri, i cili shihet si arsyeja kryesore pse ai u largua nga Juventusi. Në një postim në Instagram, mbrojtësi që iu bashkua pak ditë më parë kuqezinjve, nuk ngurroi të falënderonte Montelën që e bëri të ndjehej menjëherë i rëndësishëm.
Postimi i Bonuçit
“Kur mendon për Milanin, të tërheq menjëherë historia, ajo e kampionëve që kanë veshur fanellën e tij. Mendoj për Barezi, Kostakurta, Maldini, Nesta, Tasoti. I admiroj për atë që i kanë dhënë futbollit dhe këtij klubi, ata janë në legjendë, unë vij sot për të filluar që të shkruaj një faqe të re të historisë kuqezi dhe të karrierës time.
Fillon një sfidë e re, një aventurë e re bashkë me shokët të cilët ashtu si unë kanë shumë uri dhe dëshirë për të fituar. Falënderoj klubin, drejtorin Fasone, drejtorin sportiv Mirabeli dhe trajnerin që më dëshiroi shumë dhe më bëri të ndjehem i rëndësishëm dhe në qendër të këtij projekti ambicioz.
Jam pritur me dashuri dhe ngrohtësi të pamasë nga një pjesë e tifozerisë kuqezi dhe për këtë do të impenjohem, bashkë me shokët e mi, për të bërë të mundur që ky entuziazëm të vazhdojë dhe të ushqehet gjatë sezonit, përmes fitoreve dhe dëshirës nga ana e të gjithëve për të rikthyer Milanin në majat e futbollit italian dhe europian, duke filluar që nga ndeshja e radhës. Të bashkuar, mundemi”.