Jetmir Sefa vishet verdhezi. Ashtu sikundër paralajmëroi “Panorama Sport”, ngjau. Mesfushori ka nënshkruar kontratë me Besën dhe këto ditë do të nisë edhe stërvitjen. Me CV-në që ai ka, do të është pa dyshim një “aset” për trajnerin Ndriçim Kashami, pasi kujtojmë se ka luajtur për klube të mëdha në elitë, si Tirana, Skënderbeu e Vllaznia.

Por merkatoja ka rezervuar të tjera zhvillime, pasi dje është vënë në urdhrat e Ndriçim Kashamit edhe një mbrojtës armen.

Ai quhet Arman Zejnaljan dhe nga të dhënat e fundit rezulton se ka luajtur në vendlindje për Ararat në sezonin 2017-2018, skuadër e ligës së parë. Nuk bëhet ende fjalë për akord, pasi fillimisht 25-vjeçari do t’i nënshtrohet provës dhe vetëm nëse kalon “klasën”, mund të flitet për firmë. Nëse armeni do të bindë drejtuesit, atëherë prapavija e verdhezinjve do të konsiderohej e kompletuar.

Pezull mbetet çështja e sulmuesit Iran Gonçalvez. Në klub e presin, por thuhet se braziliani i është bashkuar Teutës. Tepër “sekret” po mbahet emri i portierit që ishte paralajmëruar t’i bashkohej ekipit sot. Në klub po tregohen tejet enigmatikë, pasi lojtari në fjalë po pret që fillimisht të marrë lejen e kalimit nga klubi ku luajti sezonin e kaluar.

Sqarohet gjithashtu se mesfushori Uheid Hoxha zyrtarisht mund të konsiderohet i larguar nga Besa, pasi kontrata e tij me bluzinjtë ka mbaruar në korrik të këtij viti. Sa i përket qendërmbrojtësit Egzon Shimaj, që mori emër te Besa sezonin e kaluar, ai ende nuk është paraqitur në stërvitje, edhe pse me letra vijon të jetë futbollist i kavajasve.

FERIZ FERIZAJ-PANORAMASPORT.AL

NDIQE LIVE "PANORAMA TV"

---