Simeone ndal Barçën, Atletiko kampione
Atletiko Madrid kurorëzohet “mbret” i Spanjës. Ndeshje pas ndeshjeje, Diego Simeone udhëheq Atletikon drejt titullit të dhjetë në histori, të parët që prej vitit 1996, të dytën që nga viti 1977. Finalja e pabesueshme e “Kamp Nou”- t përfundon 1-1 dhe me barazimin Atletiko mban blaugranat tri pikë lart në renditje dhe thyen sundimin e dyshes Barça-Real, që zgjaste prej vitit 2005. Një ndeshje që për bardhekuqtë është si kampionati i tyre, pasion, punë, solidaritet, sforco dhe bashkim. Dhe futboll, natyrisht.
Lot bardhekuq – Gati 97 mijë persona në “Kamp Nou”, më pak se 500 të Atletikos. Ksavi e Nejmar qëndrojnë në stol, ndërsa Simeone hedh në fushë formacionin e zakonshëm. Mirëpo nuk zgjat shumë dhe për trajnerin argjentinas nisin telashet, sepse në hapësirën kohore të 8 minutave, nga e 14-ta deri në të 22-ën, nga loja dalin Diego Kosta dhe Arda Turan. Të pafat futbollistët që në stol ulen duke qarë për shkak të problemeve muskulore. Shqetësimi i Simeones është edhe përballja e javës së ardhshme e Champions- it ndaj Real Madridit në Lisbonë. Mirëpo, goditja është e madhe për madrilenët, ndërsa në lojë futen Adrian e Raul Garsia dhe skuadra përpiqet që të mos ndikohet psikologjikisht. Duket se taktika funksionon, sepse Barça bën presion, por nuk arrin të shënojë.
Klas kilen – Më pas mendon Aleksis Sançez që të sjellë festën në “Kamp Nou”. Mesi i pason me gjoks një top të dërguar nga Fabregasi dhe sulmuesi kilian gjuan fort, duke e çuar topin në këndin e majtë të Kurtuasë. Një gol i mrekullueshëm, i denjë për të vlerësuar maksimalisht në një finale të madhe. Është rrjeta e 100- të për blaugranat dhe Martino në tentativën e gjashtë për herë të parë është në avantazh ndaj madrilenëve.
Lojë e ashpër – Atletiko është për t’u lavdëruar. Nuk rrëzohet edhe këtë herë, përkundrazi përvesh mëngët dhe shton presionin, duke siguruar 4 goditje këndi radhazi, të cilat i kujtojnë Barçës dobësinë që ka në goditjet standarde. Portieri vendës sjell drithërima në “Kamp Nou” dhe mbyllja e pjesës së parë vjen mes nervave të tendosura dhe shanseve të humbura. Për më tepër që janë marrë edhe 5 kartonë të verdhë.
Simeone motivues – Më pas vijnë fjalët e Diegos, i cili gjatë pushimit të pjesës së parë u jep zemër të tijve, ashtu siç vetëm ai di të bëjë. Fillon pjesa e dytë dhe pas 4 minutash David Vija godet shtyllën e Barçës, gabon vetëm për vetëm me Pinton dhe më pas Godin barazon me kokë pas një goditjeje këndi, duke djegur sërish mbrojtjen vendëse. Atletiko transformohet, Barça trulloset. Song zëvendëson Busketsin e pafat dhe “Kamp Nou” arrin t’i zgjojë të tijtë. Arbitri anulon për pozicion jashtë loje një gol të Mesit, i cili shfaq sinjale të ndrojtura zgjimi nga një gjumë letargjik. Topi tani është gjithnjë i Barçës, nis një mësymje e gjatë, por që nuk i sjell shumë halle Kurtuasë. Ksavi futet në të 77-ën minutë, Dani Alvesh provon të shënojë nga jashtë zone, Pike bën qendërsulmuesin dhe kërkon një penallti. Në momentet e fundit në zonën kundërshtare shkon edhe gardiani Pinto, por blaguranat nuk mund të bëjnë dot asgjë. Për të gjashtën herë këtë vit Atletiko nuk humbet ndaj Barçës.