Bajer Leverkusen bashkon dy binjakët Bender, Sven transferohet nga Borusia Dortmund
Bajer Leverkusen ka blerë nga Borusia Dortmund mesfushorin Sven Bender, për 15 milionë euro. Futbollisti 28-vjeçar do t’i bashkohet vëllait të tij binjak, Lars, në klubin e ri ku ka nënshkruar për katër vitet e ardhshme. Të dy kishin luajtur për herë të fundit në të njëjtin klub në vitin 2009, kur ishin pjesë e Mynih 1860.
Mesfushori largohet nga Borusia Dortmund ku kishte luajtur për 8 vite me radhë, duke qenë një nga elementët kryesorë të skuadrës e cila arriti të fitonte dy tituj kampionë radhazi në Bundesligë.
Nëpërmjet faqes së Borusia Dortmund, vetë Bender shpjegoi se i kishte kërkuar klubit që t’i bënte një nder duke e lejuar që të largohej për një aventurë të re, meqë në sezonin e kaluar kishte luajtur në total vetëm 8 ndeshje. Klubi shpjegoi nëpërmjet komunikatës se nëse do të kishte qenë një lojtar tjetër, nuk do të kishte pranuar kurrë nëj kërkesë të tillë.
Bender luajti 224 ndeshje zyrtare me fanellën e Borusia Dortmund. Ai fitoi me këtë klub 2 tituj në Bundesligë dhe 2 Kupa të Gjermanisë, si dhe luajti në finalen e Ligës së Kampioneve në vitin 2013.
NDIQE LIVE "PANORAMA TV"