Tirana dje ka pritur edicionin e nëntë të Gjysmëmaratonës Ballkanike, një aktivitet ku morën pjesë atletë nga Shqipëria, Kosova, Greqia, Turqia, Maqedonia e Veriut, Bullgaria, Qipro, ndërsa siç është bërë traditë, nuk munguan as sportistë nga jashtë kufijve të Ballkanit, si Azerbajxhani, Izraeli, Gjeorgjia apo Ukraina.

Përveç drejtuesve të Federatës Shqiptare të Atletikës dhe homologëve të tyre nga vende të ndryshme, në këtë eveniment të organizuar nga bashkia Tiranë dhe FSHA, ishte i pranishëm edhe vetë presidenti i Federatës Europiane të Atletikës, Dobromir Karamarinov.

Duke u kthyer te gara, edhe një herë tjetër Luiza Gega konfirmohet si kampione absolute dhe sukseset në rajon për të janë kthyer në formalitete.

Ndonëse e gjithë gara u zhvillua nën reshjet e dendura të shiut, Luiza Gega bëri një paraqitje të shkëlqyer. Ajo regjistroi kohën 1:10:58, duke triumfuar me shkëputje shumë të madhe nga rivalet.

Me këtë rezultat Luiza Gega vendosi edhe rekord të ri kombëtar, duke përmirësuar me 2 minuta e 47 sekonda kohën e mëparshme (1:13:11), të cilën e kishte shënuar në vitin 2017 po në Tiranë.

Rreth 4 minuta pas Luiza Gegës, mbërriti në finish turkja Bahar Altay, e cila u klasifikua e dyta me kohën 1:14:53, ndërsa vendi i tretë shkoi për turken tjetër Sabriye Guzelyurt, me kohë 1:16:16.

Ndërkohë, duke kaluar te meshkujt, fitues i garës u shpall Dario Ivanovski nga Maqedonia e Veriut, i cili regjistroi kohën 1:04:54. Ndërsa podiumi u plotësua nga turqit Onur Aras me kohë 1:05:35 dhe Mahsun Deger me kohë 1:06:07.

Ndërkohë, për sa u përket sportistëve kuqezi, Ilir Këllezi zuri vendin e shtatë me rezultatin 1:21:50.

Interesant është fakti se Këllezi ka kohë më inferiore edhe se 18-vjeçarja Redia Dauti (1:20:43), teksa kjo e fundit u klasifikua e pesta te femrat.

Për sa u përket renditjeve ekipore, në radhët e femrave triumfoi Turqia, ndërsa Shqipëria u rendit në vend të dytë. Te meshkujt ishte sërish Turqia që u shpall kampione. Në fund të aktivitetit u shpërndanë edhe çmimet për të gjithë fituesit.

PANORAMASPORT.AL

NDIQE LIVE "PANORAMA TV"

---