Apolonia kaloi në fazën tjetër të “play off”-it dhe Juri Kanarsa nuk i kursen elozhet për lojtarët. E pranon që ky ekip e bën me zemër, por thekson se ka “luftëtarë” në fushë. Pas ndeshjes, trajneri tha:

“Ky ekip të bën me zemër, ama di të fitojë përballë çdo rivali. Morëm një fitore të rëndësishme dhe jam shumë krenar për skuadrën time. Djemtë fierakë luftuan deri në sekondën e fundit për fitoren e parë ndaj pukjanëve dhe ia dolën më së miri. Kurrsesi nuk na kënaqte barazimi, pasi Apolonia hyn në fushë vetëm e vetëm për ta fituar ndeshjen.

Ne ishim dominues, paralelisht kontrolluam lojën pavarësisht se kundërshtari ishte shumë agresiv. Ata ndërhynin rëndë ndaj lojtarëve tanë, veçanërisht në duelet një për një. I përgëzoj luftëtarët e mi për paraqitjen dinjitoze në fushën e lojës. Treguam edhe një herë se në shtëpinë tonë e vendosim ne diktatin. Kjo fitore na jep më shumë vetëbesim për finalen e radhës së ‘play off’- it ndaj Korabit”.

Tërbuni bëri një kampionat vërtet të mirë, e megjithatë nuk e kaloi dot Apoloninë në finalen e parë të “play off”-it. Ëndrra për të kapur elitën mbaroi këtu dhe zyrtarisht sezonin 2022-2023 do të luajnë në Kategorinë e Parë.

Elvin Beqiri është parë i irrituar në përfundim të ndeshjes në “Loni Papuçiu”. Trajneri ka folur shumë shkurt për mediat pas ndeshjes, ndërsa hapur ironizoi presidentin e fierakëve. “Nuk ka nevojë të flas pas përfundimit të sfidës, ju mund të pyesni më shumë presidentin Koço Kokëdhima se ai i di mirë këto punë”, tha shkodrani i stolit të pukjanëve, duke lëshuar një “kunj” për kreun e klubit bardhejeshil. I gjithë ky zhgënjim i teknikut vinte prej 11-metërshit, që e cilësuan të dyshimtë.

HILMI SALIU – PANORAMASPORT.AL

NDIQE LIVE "PANORAMA TV"

---