ANALIZA/ Seria A në kohë COVID-i, të mëdhatë driblojnë virusin
Do të kujtohet si titulli i COVID-it, akoma më shumë se ai që më 2 gusht iu dorëzua Juves së Sarrit. Seria A 2020-’21 është e destinuar të kushtëzohet nga virusi më shumë se edicioni i mëparshëm që, vërtet, u detyrua në një ndalesë të gjatë që urojmë të mos përjetohet më, por më pas nga pikëpamja e infektimit u godit shumë pak. Efekti më i dukshëm i COVID-it në sezonin 2019- ’20 ishte përfundimi në verë të plotë dhe mbingarkesa e kalendarit. Tashmë situata është ndryshe: në 74 ditët e kaluara nga 19 shtatori, ka pasur 107 futbollistë pozitivë (plus të tjerë që u bllokuan gjatë fazës përgatitore) dhe 239 të padisponueshëm mes ndeshjeve të kampionatit dhe Kupave Europiane.
Vetëm Bolonja nuk ka pasur raste infektimi në nivel lojtarësh, por virusi megjithatë hyri në skuadër duke goditur trajnerin Mihajloviç. Rekordi i trishtueshëm i rasteve pozitive është i Xhenoas (plot 18), por për shkak të angazhimeve në Champions të Interit, janë zikaltrit skuadra që ka grumbulluar më shumë mungesa për shkak të virusit: plot 28. Roma ka luajtur numrin më të madh të ndeshjeve me së paku një futbollist të padisponueshëm prej tamponit pozitiv (plot 11: 7 në Serinë A dhe 4 në Ligën e Europës), por duke u limituar në kampionat rekordi i trishtë është i Sasuolos, që në të gjitha javët ka pasur së paku një rast pozitiv. Është mjaft interesant fakti që Juve-Napoli e 3-0 në tavolinë ka përfshirë dy klube jo veçanërisht të goditura: Pirlo humbi thuajse njëherësh Ronaldon dhe MekKenin, Gatuzos deri tani i është dashur të heqë dorë vetëm nga katër elementë. Ndërsa Lacios i kanë munguar shumë titullarë: Imobile, Strakosha, Luis Alberto, Milinkoviç-Saviç, Leiva, Laxari.
HAKIMI, FALS POZITIV – Dikush ka qëndruar pozitiv për një muaj e gjysmë (Boga: nga 20 gushti më 5 tetor) dhe dikush vetëm disa net (Hakimi: i ndalur nga tamponi i UEFA-s më 21 tetor, por më 23 u zbulua se ishte një fals pozitiv, fakt që e bëri megjithatë të mungojë sfidën e parë me Borusian). Pelji ndodhet larg Boljaskos rreth 30 kilometra, më pak në vijë ajrore, por duken dy kontinente të ndryshme: “vatër” te Xhenoa, ndërkohë Sampdorias i është dashur të shqetësohet vetëm për Keitanë. Te Kaljari u prekën Godin, Nandez, Simeone dhe Pereiro. Protokolli i rreptë i studiuar për të garantuar zhvillimin e kampionatit, megjithatë, po e kryen mirë detyrën.
NGA IBRA TE CR7 – Përtej statistikave, mbetet fakti që ky kampionat është shumë i bukur, i pasigurt, interesant, siç nuk ndodhte prej kohësh. Milani ka ditur të fitojë edhe pa Ibrën, ndërsa Juvja pa Ronaldon barazoi kundër Krotones dhe Veronës. Nëse linja e infektimeve në Serinë A do të mbetet kjo, do të mund të flitet për kampionat të kuzhtëzuar, por me siguri jo të trukuar.
PANORAMASPORT.AL
NDIQE LIVE "PANORAMA TV"