Alarm dëmtimesh në Bundesligë, + 266 për qind rreziqe muskulore
Ajo që shihej si frika më e madhe përpara se gjithçka të niste, tashmë ka marrë konfirmimet e para. Rifillimi pas karantinës në të gjithë kontinentin e vjetër sjell edhe një numër të konsiderueshëm dëmtimesh. Në mbështetje të kësaj teorie, nga Gjermania vjen një studim i bërë nga doktor Xhoel Mejzon, kërkues australian i Institutit të Shkencave në Sport, në Universitetin e Jenas, të dhënat e të cilit nuk janë aspak optimiste. Nga raportet dhe faktet e fushës, vetëm pas javës së parë rreziku i dëmtimeve (ishin 12 të konfirmuara gjatë dhe pas ndeshjeve të javës së parë post-Koronavirus) janë rritur me 266 për qind, ose e thënë ndryshe, rreziku është rritur nga 0.27 në 0.88 dëmtime për ndeshje.
Pas javës së dytë, mes dëmtimeve “të vjetra” dhe atyre të evidentuara, në infermieri kërkuan “ndihmë” plot 65 futbollistë, ose e thënë ndryshe, thuajse 3 futbollistë për skuadër. Përgatitja fizike e bërë në një kohë të shkurtër, bashkuar edhe me ndeshjet e ngjeshura, por edhe me vapën që sidomos në muajt korrik apo edhe gusht do të jetë e pashmangshme, rreziqet dhe armiqtë për futbollistët nuk do të jenë vetëm rivalët që do të gjejnë përballë, por edhe faktorë, nga të cilët duket e vështirë që të ruhesh. E thënë ndryshe, rreziku që futbollistët të kenë dhimbje dhe të pësojnë dëmtime është shumë, po shumë i madh, prandaj kuptohet edhe arsyeja sepse FIFA dha OK-in për kryerjen e 5 zëvendësimeve, pas kësaj pandemie. Në Bundesligë, mes dëmtimeve të “luksit” pas rifillimit të kampionatit figurojnë Tiag Alkantara i Bajernit të Mynihut, Jusuf Poulsen i Lajpcigut (ky do të vuajë 5 muaj qëndrim jashtë fushave), por ndërkohë edhe në Itali, ndonëse vetëm janë stërvitur, janë dëmtuar yje si Zlatan Ibrahimoviç; apo edhe Samuel Umtiti (Barcelona) dhe Zhoao Feliks (Atletiko) në Spanjë.
PANORAMASPORT.AL
NDIQE LIVE "PANORAMA TV"