Bizneset e vogla dhe të mesme greke po vërshojnë nëpër vendet e rajonit, duke përfshirë Shqipërinë, pasi, sipas tyre, ka një klimë më miqë- sore për aktivitetin e tyre, ndryshe nga taksat e rënda me të cilat thonë se përballen në Greqi.
Gazeta kombëtare greke “Kathimerini” ka raportuar në muajin maj se një e katërta e bizneseve të vogla dhe të mesme greke, rreth 200 mijë biznese kishin falimentuar që nga nisja e krizës ekonomike, në vitin 2008.
Megjithatë një nga problemet më të mëdha të Greqisë të kohëve të fundit ishte vendosja e kontrollit të kapitaleve në banka, i cili hyri në fuqi që më 28 qershor, për shkak se vendi rrezikonte të dilte nga eurozona dhe të gjithë vërshuan në banka të tërhiqnin paratë e tyre.
Kjo masë u lejonte të tërhiqnin vetëm një pjesë të vogël parash në ditë. Dhe kjo, me sa duket, ka penguar funksionimin normal të bizneseve. Së fundmi, Konfederata Nacionale e Dhomës së Tregtisë ka raportuar se rreth 60.000 biznese greke kanë paraqitur kërkesën për ta zhvendosur aktivitetin e tyre jashtë Greqisë, veçanërisht në Shqipëri, Bullgaria dhe Qipro, ku për ta ka më pak shpenzime sesa në Greqi.
Kjo është domethënëse për ekonominë greke, pasi rreth 98 për qind e bizneseve të vendit janë të vogla dhe të mesme, sipas Vassilis Korkidis, President i Konfederatës Tregtare. “Problemi për bizneset e vogla dhe të mesme është se janë mbingarkuar me taksa prej një kohe të gjatë, por tani është tepër.
Pas skenarit të mbylljes së bankave, ne po përballemi me rrezikun e ikjes së biznesit, dhe këtë nuk e ndalon dot një kontroll kapitali”, tha ai. Sipas tij, leja e bizneseve për t’u zhvendosur nuk është aktivizuar ende, por kjo do ta përkeqësonte ekonominë greke.
NDIQE LIVE "PANORAMA TV" © Panorama.al