Shënimi i javës, përsëri elefanti me farfurinat ose Rama me OSBE-në

| 10:10
SHPËRNDAJE
 

GENC POLLO

1200px-Genc_Pollo-700x465

Kryeministri Rama propozoi para dy ditësh Ditmir Bushatin, ish-ministrin e tij për Europën e Punët e Jashtme, për postin vakant të Përfaqësuesit të Lirisë së Medias të OSBE-së. Ky lajm nuk do e kalonte cakun e normales dhe as vëmendja ndaj tij nuk do të shkonte përtej ciklit 24-orësh, sikur Rama të mos ishte njëkohësisht edhe kryetar i radhës i OSBE-së. Këtë dua të shtjelloj më poshtë.

NJË BRAVO PËR SHQIPTARËT ME POSTE NDËRKOMBËTARE!

Por, fillimisht do të thosha se zyrtarët shqiptarë që marrin poste ndërkombëtare lipsen të mirëpriten e përkrahen nga të gjithë si simbol i konsideratës së Europës e botës ndaj Shqipërisë dhe, në një masë të vogël, si rritje e ndikimit të vendit tonë përtej kufijve të tij. Kryeministri Berisha propozoi deputetin (dhe ish-Kryeministrin) opozitar Pandeli Majko për një post të rëndësishëm në OKB. Ndërsa Kryeministri Rama propozoi ishdeputeten (dhe ish-ministren) e PD-së, Majlinda Bregu, për Sekretare të Përgjithshme të Këshillit Rajonal të Bashkëpunimit (RCC) me seli në Sarajevë. Ndërkohë që propozimi Bushati është “brendapartiak”, një vëzhguesi të largët dy rastet e para do t’i dukeshin një gjysmë mrekullie politike në mjedisin e superpolarizuar mes qeverisë e opozitës në Shqipëri. Por nuk është tamam kështu. Majko asokohe kishte përkrahjen e partisë së tij. Rama në 2018 dukej sikur hallin e kishte më shumë të përçante e dobësonte opozitën.

Vijimi është histori. Majko nuk e kapi dot postin si pasojë e konkurrencës globale, ndërsa Bregu e pati më kollaj dhe e kapi. Gjatë pandemisë me kufij të mbyllur “korsitë e gjelbra” që mundësuan një minimum tregtie ndërmjet shteteve të Ballkanit Perëndimor u realizuan nga Komisioni Europian, RCC e CEFTA (për mini Shengenin nuk u kujtua kush!). Për këtë lipset një lavdërim apo falënderim edhe në adresë të RCC e znj. Bregu.

PRECEDENTI NEGATIV NUMËR 3 I RAMËS ME OSBE-NË

Rama është i vetmi kryetar i radhës së OSBE-së që nga themelimi i kësaj organizate, i cili ka shkelur rekomandimet e adresuara specifikisht. E bëri këtë në rastin e ligjeve të medias në fillim të vitit si edhe me ndryshimet zgjedhore këtë verë. Këtë gjë nuk e bëri as Kazakistani, shteti me kredenciale demokratike të diskutueshme gjatë kryesisë së tij në vitin 2010. Sikur kjo të mos mjaftonte, Rama, me propozimin Bushati, po krijon për të tretën herë një precedent negativ. OSBE po kalon një krizë politiko-administrative që një shtet i vogël në krye të saj e ka të vështirë ta përballojë.

Të katër agjencitë, përfshi edhe ODIHRin, nuk kanë drejtues titullarë me mandat të plotë për shkak të mosmarrëveshjeve mes shteteve anëtare. Për gjetjen e kompromisit mes tyre, kryetari i radhës gjithmonë ka qenë një “honest broker”, një ndërmjetësues i ndershëm që mundëson kompromisin e marrëveshjen. Në momentin që kryetari propozon kandidatin e tij e vë veten në konflikt interesi dhe heq dorë de facto nga të qenit “honest broker”. Por mbase Rama ka hequr dorë edhe nga më shumë se kaq. Mostakimet në Berlin janë edhe një sinjal tërthor i dorëheqjes. Kryesia e radhës me rol në Bjellorusi po përvijohet gjithnjë e më shumë nga Suedia, e cila zyrtarisht e merr funksionin në janar 2021.

KREDENCIALET E BUSHATIT

Sa më lart nuk lidhet detyrimisht me kandidatin Bushati. Por rrethanat e kanë sjellë sërish berrin të varet te këmbët e veta. Kredencialet personale përcaktohen nga vendime personale. Ndërkohë që Bushati ka heshtur për shkelje të normës dhe apeleve të OSBEsë për ligjet zgjedhore; në rastin e ligjeve të medias u mjaftua me abstenim e kritikë të mekët. Duket si pak për të synuar besueshëm një post ku nuk përfaqësohen vlerat e qeverisë propozuese, por ato të gjithë organizatës. Ose mbase këto kredenciale ai don t’i shfaqë nga kjo javë që vjen deri në nëntor, kur OSBE mblidhet me shpresë se do të gjejë kompromis.

Te lidhura



Subscribe

      
             

Për t’u bërë pjesë e grupit të "Panorama" mjafton të klikoni: Join Group dhe kërkesa do t’ju aprovohet.
KOMUNITETI PANORAMA ONLINE: https://facebook.com/groups/panoramaonline/

 

S'KA KOMENTE

Comments are closed.