Këngëtari i ndjerë do të festonte sot 27-vjetorin e lindjes së tij, nëse një aksident tragjik me motor nuk do ti merrte jetën rreth 5 vite më parë.
Dhe motra e tij, Barbana Dini e ka kujtuar të vëllanë me fjalët prekëse në një postim në Instagram.
Këngëtarja publikoi një foto të Ergi Dini dhe shkroi: “Sot është dita jote e lindjes, do bëheshe 27 vjeç! Nuk gjej dot fjalë ta shpreh se sa shumë mall kam për ty Ergi! Nuk ka moment që nuk të kam në mendje… Koha kalon, malli shtohet e fjalët pakësohen, sepse nuk kanë më vlerë…
Festo me ëngjëjt, ëngjëlli im, dhimbja ime më e madhe……………..”.
Mbrëmjen e 21 nëntorit të vitit 2016, Ergi Dini së bashku me shokun e tij, Kejdi Halili po udhëtonin me motor në bulevardin “Bajram Curri”, kur pësuan aksident.
Drejtuesi i mjetit, Kejdi Halili, në atë kohë 21-vjeç, sapo kishte dalë nga rruga e Bllokut për në bulevard, pikërisht para Ambasadës Ruse, kur ka ngritur motorin në gomën e pare.
Por, kjo lëvizje ka provokuar humbjen e kontrollit të motorit dhe të dy, si shoferi dhe pasagjeri, janë rrëzuar.
Nga përplasja e fortë me bordurën e trotuarit dy të rinjtë morën plagë të rënda.
Ata u dërguan në Spitalin Ushtarak të Tiranës por nuk arritën t’i mbijetonin plagëve të marra.
/Panoramaplus.al
