Betejë në Idbil, bastioni i fundit i rebelëve sirianë, të mbështetur nga SHBA, pritet të nisë së shpejti me forcat aleate të Presidentit Bashar Al Assad që janë në fazat e fundit të përgatitjes së sulmit dhe me një OKB të shqetësuar për rrezikun e jetëve të civilëve në atë qytet.
Kremlini të martën refuzoi paralajmërimin e Presidentit Donald Trump se një sulm ndaj enklavës së fundit të madhe të rebelëve sirianë do të ishte një “gabim i rëndë humanitar”, duke thënë se rebelët e Idlib po pengojnë përpjekjet në një zgjidhje diplomatike të krizës.
“Presidenti Bashar alAssad i Sirisë nuk duhet të sulmojë me padurim territorin e Idlibit”, shkroi Trump. “Rusët dhe iranianët do të bënin një gabim të rëndë humanitar për të marrë pjesë në këtë tragjedi njerëzore të mundshme, qindra mijëra njerëz mund të vriteshin”.
Kërkesa e Trump erdhi menjëherë pasi ministri i Jashtëm i Iranit tha se terroristët duhet të pastrohen nga Idlib, bastioni i fundit i opozitës rebele të regjimit të Assad në vend. Komentet e Mohammad Javad Zarif në Damask erdhën pasi forcat siriane dhe aleatët e tyre po përgatiten për një sulm në Idbil. Por brenda disa orësh nga mesazhi i Trump, avionët rusë thuhet se kryen sulme ajrore kundër pozicioneve rebele.
Sipas “Reuters”, sulmet ajrore filluan të martën në afërsi të qytetit të Jisr al-Shughour në krahinën që kufizohet me Turqinë. Assad po ndërton forca për një ofensivë me faza, e cila synon marrjen e kontrollit të provincës në Sirinë veriperëndimore. Zëdhënësi i Kremlinit, Dmitri Peskov, tha se sulmet e rebelëve nga Idlib paraqesin një kërcënim për bazat e përkohshme të Rusisë në vendin e goditur nga lufta.
“Është e qartë se ky problem duhet të zgjidhet. Ne e dimë se forcat e armatosura siriane po përgatiten për trajtimin e këtij problem”, tha Peskov. Ai e quajti Idbilin “çerdhen e terroristëve”, por në këtë provincë janë gjithashtu 2 milionë refugjatë. Shtëpia e Bardhë tha se po e monitoron situatën në Idlib. “Le të jemi të qartë, është qëndrimi ynë i vendosur se nëse Presidenti Bashar al-Assad zgjedh të përdorë armë kimike përsëri, SHBA dhe aleatët e saj do të përgjigjen me shpejtësi dhe në mënyrën e duhur”.
Tensionet po vijnë në një kohë kur po bëhen përpjeke për një Kushtetutë të re në Siri, me krijimin e një komisioni të posaçëm. Në fillim të javës së ardhshme, përfaqësues nga Turqia, Rusia dhe Irani do të takohen me Staffan de Mistura, i dërguari special i OKB në Siri. Pak ditë më vonë, Mistura do të takojë përfaqësues nga SHBA, Mbretëria e Bashkuar, Franca, Arabia Saudite, Jordania, Gjermania dhe Egjipti.
Mistura, në Gjenevë, kërkoi përmbajtje nga sulmet, duke thënë se dhuna mund të mbajë peng përpjekjet për një marrëveshje politike. Lufta civile në Siri po zgjat prej shtatë vitesh, ka kushtuar me qindra mijëra jetë dhe ka dëbuar miliona njerëz nga shtëpitë e tyre.
PANORAMA
NDIQE LIVE "PANORAMA TV" © Panorama.al
