Agron Duka nuk është një talent në politikë. Këtë e pranon edhe vetë, kur thotë se është një zanat i vështirë. I ftuar në emisionin “Ditë e Re”, Duka ka folur në një intervistë ndryshe, jo për të bërë politikë, por për të treguar për politikën.
Ai sqaron se politikën nuk e kërkoi, por hyri në të nga një takim rastësor me ish-kryeministrin Fatos Nano.
Ja çfarë tregon për politikën para dhe pas 90-tës.
Agron Duka: Te merresh me politikë është një zanat i vështirë. Unë nuk është se jam ndonjë talent, edhe si formim jam agronom. I përkas një brezi që kemi lindur në kohën e Enverit. Nuk ka pasur shkollë politike, sepse atëherë politikë ishte të merreshe me direktivat e partisë.
Unë pas 90-s jam marrë me biznes, kam lënë punën e shtetit. Rastësisht nga një njohje rastësore me Fatos Nano unë hyra në politikë. Pra nuk është se unë e kërkova, por ndoshta qe rastësia, ndoshta ato kanë qenë vite me shumë idealizëm. Shqipëria nuk kishte eksperiencë politike dhe si e tillë e ndjente që ai që është i majtë duhet të jetë majtas dhe ai që është i djathtë duhet të jetë djathtas.
Ai thotë se politika e sotme nuk është njësoj si politika e fillimeve të demokracisë. Agron Duka tregon se kur kandidoi për deputet i pavarur, por që mbështetej nga PS, shokët e tij të djathtë nuk i flisnin me gojë.
Agron Duka: Sot nuk ka ashtu. Njerëzit më vonë mësuan që këto që ishin lart filluan të bëjnë aleanca majtas dhe djathtas, sepse kështu e ka politika, atëherë këta poshtë pse duhet të ishin kaq të ndarë me vijë ideologjike.
Unë jam dëshmitar i këtyre ngjarjeve. Njerëz të mi, shokë meqë unë kandidova si i pavarur i mbështetur nga PS dhe ata ishin djathtas nuk më flisnin, arritëm u ndamë.
Sot nuk ekziston kështu. Përderisa erdhi puna bënë aleancë, Rama-Meta, Berisha-Meta e kështu me radhë të gjithë. Në fund të fundit mirë kanë bërë janë politikanë që e njohin mirë këtë zanat, sepse ndryshe mund të krijoheshin këto ngërçet.
Sot ka një situatë tjetër, që për mendimin tim është më e mirë. Po të pyesësh njerëzit poshtë, edhe ata vetë nuk dinë ti dallojnë mirë se kush është një politikë e majtë dhe një i djathtë./Oranews
NDIQE LIVE "PANORAMA TV" © Panorama.al
