Partia Demokratike ka denoncuar sot një ngjarje të ndodhur në Sukth, ku sipas saj një biznesmen u dhunua nga një bandë e armatosur dhe e maskuar.
Por pak pas denoncomit të PD-së, për dhunimin e biznesmenit Osman Pana, ka reaguar policia e Durrësit e cila thekson se nuk ka asnjë bandë për të cilën flet PD, por bëhet fjalë për një konflikt mes fqinjësh që përfundoi edhe me konflikt fizik.
Policia ka sqaruar se ka pasur vetëm rrahje me shkopinj, ndërkohë që pas hetimeve, janë identifikuar edhe përgjegjësit dhe kanë shpallur në kërkim.
Kreu i Departamentit të Rendit e Sigurisë në PD, Enekeleid Alibeaj, deklaroi gjatë një prononcimi për media se një bandë e armatosur me kallashnikov dhe me maska ka dhunuar biznesmenin Osman Pana, në orën 6:30 të mëngjesit në mes të Sukthit.
Ai akuzoi kryetarin e bahskisë vangjush Dako dhe kryeministrin Rama si të lidhur me këtë bandë, që i kanë shërbyer në zgjedhje.
NJOFTIMI I POLICISE:
Identifikohen dhe shpallen në kërkim autorët e plagosjes në Sukth. Sot rreth orës 07:30 të mëngjesit në Sukth, dyshohet se 2 persona kanë goditur me sende të forta shtetasin O.P. 32 vjeç, banues në Sukth, i cili ka pësuar dëmtime të lehta në trup.
Specialistët për Krimet në Komisariatin e Policisë Durrës në sajë të veprimeve hetimore kanë identifikuar dhe po punohet për kapjen e autorëve të dyshuar të kësaj ngjarje.
Ata janë shtetasit: • A.M. 42 vjeç, banues në Sukth; • B.B. 40 vjeç, banues në Sukth. Shkak për ngjarjen dyshohet se ka qenë një konflikt që shtetasi O.P. ka patur me fqinjin e tij, shtetasin Xh.N., pasi hapi një dritare në krah të banesës së këtij të fundit.
Autorët e dyshuar kanë lidhje shoqërore me shtetasin Xh.N. Materialet i kaluan Prokurorisë së Rrethit Gjyqësor Durrës për veprime të mëtejshme për veprën penale “Plagosja e lehtë me dashje”, e kryer në bashkëpunim parashikuar në nenin 89 dhe 25 të Kodit Penal.
NDIQE LIVE "PANORAMA TV" © Panorama.al