Dorëheqja e Elvis Roshit sot në mesditë detyron partitë të bëhen gati për një tjetër betejë lokale përpara zgjedhjeve të përgjithshme të vitit të ardhshëm.
Tashmë nuk do të jetë një, Bashkia e Dibrës, por dy njësitë vendore ku do të zhvillohen zgjedhje të parakohshme.
Kavaja, qyteti bastion i demokratëve, ku Sali Berisha ka marrë disa mandate deputeti dhe ku zgjedhjet lokale nuk diskutoheshin, prej vitit 2011 kishte ndryshuar drejtim, shkruan sot panorama.al.
Elvis Roshi u zgjodh kryebashkiak pesë vjet më parë duke mundur kandidatin e të djathtës Refik Rrugija, pasi ky i fundit shikohej nga kavajasit si një njeri i konsumuar.
Roshi mori 53% të votave duke bërë që për herë të parë një socialist të fitonte Kavajën.
Në zgjedhjet e vitit 2015, Roshi, tashmë edhe me mbështetjen e Ramës kryeministër dhe LSI-së në Qeveri fitoi përballë Ëngjëll Carës së PD-së me një diferencë prej 8 mijë votash.
Zgjedhje edhe në Dibër
Megjithëse ende nuk ka një datë të mbajtjes së zgjedhjeve, edhe dibranët pritet të shkojnë drejt kutive të votimit për të zgjedhur kryebashkiakun e ri.
Shukri Xhelili u shkarkua nga Qeveria pas publikimit të një videoskandali ku i kërkonte seks një punonjëseje të Bashkisë.
Por procesi është pezulluar pasi Xhelili e ka çuar në Gjykatën Kushtetuese vendimin e Qeverisë dhe fillimisht duhet pritur qëndrimi i Gjykatës përpara se të organizohen zgjedhjet.
Dibra ishte një tjetër bastion që iu rrëzua demokratëve në zgjedhjet e vitit të kaluar. Pas katër mandateve të Ilir Krosit të PD-së, dibranët ia besuan Bashkinë kandidatit të së majtës Shukri Xhelili, i cili e fitoi me rreth 400 vota.
Por siç edhe dihet nuk e gëzoi gjatë pasi dy javë më parë u shkarkua nga Rama.
NDIQE LIVE "PANORAMA TV" © Panorama.al
