Ministria i Drejtesisë së Turqisë ka dërguar një kërkesë të dytë në Greqi për ekstradimin e ushtarëve turq që kërkohen në lidhje me puçin e dështuar të vitit të kaluar, raporton Reuters duke u mbështetur në të dhënat e transmetuara nga CNN-ja turke.
Ministria turke e Punëve të Jashtme publikoi një komunikatë me shkrim rreth vendimit të Gjykatës së Lartë të Greqisë (Areios Pagos) për mos t’i dorëzuar Turqisë 8 ushtarakët puçistë, që u arratisën në Greqi pas tentativës së dështuar për grusht shteti, ndërmarrë më 15 korrik 2016 nga organizata terroriste guleniste (FETO).
Komunikata e Ministrisë së Punëve të Jashtme të Turqisë rikujton se drejtësia greke ka refuzuar kërkesën për ekstradimin e ushtarakëve puçistë, që kanë marrë pjesë direkt në tentativën për grusht shteti, ndërsa vijon me këto fjalë:
“Protestojmë këtë vendim, i cili pengon nxjerrjen përpara Gjyqësorit të pavarur turk të këtyre personave, që kanë luajtur rol aktiv në një tentativë për grusht shteti duke shënjestruar rendin demokratik në Turqi, martirizuar 248 dhe plagosur 2 mijë e 193 qytetarë turq në radhët e forcave të sigurisë dhe civilëve, si dhe duke kërcënuar seriozisht jetën e Presidentit tonë të nderuar.”
“Përmes këtij vendimi të zyrtarëve grekë, që deri më sot kanë penguar llogaridhënien përpara drejtësisë të anëtarëve të organizatave terroriste, sidomos të DHKP/C-së dhe PKK-së, të cilat kanë në shënjestër Turqinë, është parë edhe një tjetër herë se Greqia, një vend fqinj dhe aleat, i bën bisht përmbushjes së kërkesave dhe përgjegjësive minimale në luftën kundër terrorizmit dhe krimit të organizuar”, vijon komunikata e MPJ në Ankara.
Qëndrimi në fjalë i Gjyqësorit grek – thekson më tej komunikata – shkakton mosndëshkimin e kriminelëve dhe njëherësh shkeljen e të drejtave të personave të dëmtuar, në kundërvajtje me normat dhe parimet e të drejtës ndërkombëtare.
“Si një vend i ballafaquar me puçe ushtarake në të kaluarën, Greqia, mjerisht, me këtë vendim ka rënë në pozitën e një shteti përkrahës dhe strehues të puçistëve”, nënvizohet mes të tjerash në komunikatën e Ministrisë së Jashtme turke.
Pasi tërheq vëmendjen se kundër vendimit në fjalë të Gjykatës së Lartë të Greqisë do të ndiqen të gjitha rrugët ligjore të mundshme dhe do të vazhdohen nismat për ekstradimin dhe gjykimin e kriminelëve, komunikata me shkrim e MPJ turke përfundon me këto reshta: “Efektet e këtij vendimi, i cili mendojmë se është i motivuar politikisht, mbi marrëdhëniet tona dypalëshe, mbi bashkëpunimin tonë në luftën kundër terrorizmit dhe mbi projektet tona të përbashkëta në fusha të tjera bilaterale e rajonale, do t’i nënshtrohen gjithashtu një rivlerësimi tërësor.”
Kërkesa e dytë
Kërkesa është dërguar një ditë pasi një gjykatë greke ka vendosur kundër ekstradimit të oficerëve turq të cilët pas dështimit të grusht shtetit u larguan për Greqi me helikopterë.
Vendimi i Gjykatës Supreme greke të enjten nuk lejoi ekstradimin e tetë ushtarëve, që kërkojnë azil politik me arsyetimin se ata frikësohen të jetojnë në Turqi.
Autoritetet turke i akuzojnë këta ushtarë se kanë qenë të përfshirë në puçin e dështuar, ndërsa i ka shpallur tradhëtarë.
NDIQE LIVE "PANORAMA TV" © Panorama.al
