Ora 12 pas mesnate kishte kaluar. Kishte hyrë dita e dhjetë e protestës së demokratëve përpara Kryeministrisë. Qeveria nuk kishte bërë asnjë lëvizje për të lënë të kuptohej se do të merrte parasysh kërkesat e tyre, por demokratët nuk i shqetësonte ky fakt, raporton “Panorama”.
Hyrja në drejtim të bulevardit “Dëshmorët e Kombit” ishte e qetë. Zhurmat fillonin sapo u afroheshe dy kullave përballë Piramidës. Disa kafene dhe një dyqan ushqimesh kishin hequr tabelat e orareve në dyert e tyre, duke qëndruar hapur 24 orë.
Ato ditë-net të gjata qëndrese të demokratëve krahas zhurmave, kishin ngrohur edhe xhepat e bizneseve në qendër të Tiranës. Në mbrëmjen e së dielës, “zotër” të çadrës ishin militantë të PD nga Shkodra dhe Lushnja.
Në një stol të vendosur në të majtë të hyrjes së çadrës, sekretari i Përgjithshëm në PD, Arben Ristani, qëndronte i ulur i vetëm dhe thuajse nuk komunikonte me askënd. Në hyrje të çadrës takojmë deputetin Flamur Noka.
Orët e vona e reflektonin lodhjen, megjithatë vendimmarrjen për të qëndruar çdo natë në çadër pranon se e kishte marrë vetë.
“Nga 10 ditë që kemi që rrimë në çadër, në 6 prej tyre kam preferuar të qëndroj përgjatë gjithë natës. Demokratët e ardhur nga rrethet kanë nevojë për orientim dhe për mbështetje. Duke qenë edhe ish-ministër i Brendshëm, qëndroj për të komunikuar me efektivët e policisë për çdo shqetësim dhe për të shmangur çdo incident të mundshëm”, rrëfen për “Panorama” Noka.
Në ditën e 10-të të protestës numëroheshin me dhjetëra njerëz në çadër, por ajo që binte në sy ishte mungesa e femrave.
NATA
Kishte kaluar ora 01:00. Demokratët i kishin dhënë fund darkës në atë që e kishin pagëzuar si sheshi i lirisë. Kutitë e kartonit të picave dhe shishet plastike të ujit i shihje në çdo cep.
Ngrohëset e shpërndara në të gjithë hapësirën e çadrës e mbanin ambientin të ngrohtë. Në bisedat mes demokratëve duket se qëndresa në vendnumëro nuk i kënaqte plotësisht. Mina Prifti kishte ardhur për herë të tretë nga Lushnja. Për të ka ardhur koha që PD të thërrasë një tjetër protestë të madhe.
“Rezistenca ka kuptimin e vet. Nëse kjo qeveri pretendon se do të përballet pafundësisht me qytetarët, mendoj se po i bën llogaritë gabim. Duhet që sa më shpejt të ketë zgjedhje. Faktori ndërkombëtar të gjejë momentin e duhur për të reaguar dhe të bëjë pjesën e vet përballë kësaj situate. Natyrisht që pritet që pas asaj proteste më 18 shkurt dhe kësaj qëndrese, të vijë momenti që të ketë një protestë edhe më të madhe se ajo e para”, thotë me bindje përfaqësuesi i strukturave të PD-së në Lushnjë.
Ora kishte shkuar 03:00. Mund t’i numëroje me gishta burrat që nga lodhja kishin vendosur të vinin pak gjumë në sy. Pjesa më e madhe kishin marrë me vete letra bixhozi e domino dhe mes humorit shkodran prisnin mëngjesin.
Kryebashkiakja e Shkodrës, Voltana Ademi, kishte vendosur t’i shoqëronte vetë anëtarët e strukturave të PDsë. Për të, vetëm shqiptarët mund t’i japin zgjidhje kauzës së zgjedhjeve të lira dhe të ndershme.
“Vetëm shqiptarët mund ta bëjnë këtë. Sepse është çështje kombëtare. Është çështja jonë. Më shumë se kurrë duhet ta bëjmë sot. Nëse nuk e bëjmë sot, do të jetë tepër vonë nesër. Ajo që po instalohet në Shqipëri i ngjason komunizmit, por më i rrezikshëm se ai që kemi kaluar për 50 vjet”, pohon Ademi.
Rreth orës gjashtë të mëngjesit, çadrës fillojnë t’i bashkohen përfaqësues të strukturave të Tiranës. Protesta do të njohë një ditë të re dhe askush nuk do të thotë sa do të zgjasë. Kur i pyet, ngrenë supet, por me bindje thonë: “Nuk ikim pa fitore”.
JUXHIN MUSTAFARAJ/PANORAMA
NDIQE LIVE "PANORAMA TV" © Panorama.al
