Rëndohet bilanci i aksidentit që ndodhi dje në aksin rrugor Levan-Fier, ku pas 18-vjeçarit Ermir Tare, ka ndërruar jetë edhe 20-vjeçari Fiori Duraj.
Policia ka arrestuar 40-vjeçarin, A.K., i cili drejtonte në gjendje të dehur mjetin tip “Benz”, me të cilën përplasi një tjetër makinë tip “Benz”, që drejtohej nga Qirjak Dori, e ku ndodheshin të rinjtë e ndjerë.
“Panorama” mëson se shoferi i makinës së përplasur Qirjak Dori, ndodhet në gjendje të rëndë në spital. Sjellim në vëmendje që aksidenti ndodhi dje rreth orës 14:30 minuta. Njëra prej automjeteve përplasi fuqishëm tjetër në pjesën e pasme, duke e ndarë thuajse në dy pjesë.
Të gjithë personat e dëmtuar në aksident ishin të moshës nga 16 deri në 21 vjeç. Drejtuesi i “Benz”-it që shkaktoi aksidentin nuk pësoi dëmtime të rënda, dhe u arrestua nga Policia e Vlorës.
Si pasojë e aksidentit të rëndë, Policia mbylli për më shumë se 60 minuta një pjesë të autostradës në kahun e lëvizjes nga Fieri në drejtim të Vlorës, ndërsa lëvizja e automjeteve u krye nga rruga e vjetër nacionale FierVlorë.
Njoftimi i policisë
Shtetasin A. K., 40 vjeç, banues në Fier, pasi ditën e djeshme, duke drejtuar në gjendje të dehur mjetin tip “Benz”, ka përplasur një tjetër mjet tip “Benz” me drejtues shtetasin Q. D., 21 vjeç, banues në Fier, i cili udhëtonte me katër pasagjerë. Si pasojë kanë ndërruar jetë në spitalin e Vlorës 2 nga pasagjerët, shtetasit E. T., 18 vjeç dhe F. D., 20 vjeç, ndërsa dy pasagjerët e tjerë, shtetasit K. D., 20 vjeç, R. L., 22 vjeç dhe drejtuesi i mjetit, shtetasi Q. D., ndodhen në gjendje të rëndë shëndetësore.
