Mediat austriake e kanë cilësuar me fat skuadrën e Salzburgut për këtë fitore të marrë ndaj Partizanit në Ligën e Kampioneve, pas një sfide shumë të vështirë.
“Salzburg fiton betejën e ashpër në Shqipëri” shkruan “Der Standard”, e cila e vlerëson si “të dalë nga hiçi” penalltinë e shkaktuar nga Ibrahimi ndërsa përgëzon displinën taktike të skuadrës shqiptare..
“Laola1” mban titullin “Fitore si e Pirros në Shqipëri”, duke përmendur këtu jo vetëm paraqitjen zhgënjyese të skuadrës austriake, por edhe dëmtimin e Sorianos, elementit më cilësor që ka në përbërje kjo skuadër.
“Vazhdon ëndrra në Ligën e Kampioneve për Salzburgun”, titullon “Sportnet”, i cili i jep rëndësi golit të shënuar në fushën kundërshtare nga kampionët e Austrisë.
Komenti më i ashpër vinte nga “Kurier”. “Një penallti e dhuruar ndihmon Salzburgun e dobët” titullohej artikulli në faqen e internetit, ku theksohej se si Salzburgu duhet ta cilësojë veten me fat që mori një fitore në fushën kundërshtare pas një paraqitje pa ngjyrë.
