FATION BINJAKU/ Para nisjes së sesionit të ri parlamentar, Instituti i Studimeve Politike, i drejtuar nga Afrim Krasniqi, ka publikuar raportin e monitorimit të performancës së deputetëve.
Në këtë raport është analizuar veprimtaria e 140 deputetëve të Kuvendit ku janë vlerësuar deputetët me efikasitet të lartë. Katër deputetët më të vlerësuar janë: deputeti i PS-së Erjon Braçe, deputetja e PD-së Jorida Tabaku, socialistja Vasilika Hysi dhe demokratja Albana Vokshi.
Në renditje, Braçe dhe Tabaku kanë marrë të njëjtin vlerësim me 64 pikë, duke u renditur të parët. Ndërkohë që Vasilika Hysi është vlerësuar me 59.5 pikë, ndërsa Albana Vokshi me 57 pikë. Pikët maksimale në këtë vlerësim kanë qenë në total 100.
Ndërkohë që në këtë listim është bërë dhe vlerësimi i deputetëve më të dobët të Parlamentit. Ndër deputetët me efikasitet më të dobët në Parlament renditet i fundit Agron Çela i LSI-së me 6 pikë, Edi Paloka i PD- së me 6.5 pikë, Lefter Koka i LSI-së me 8 pikë dhe Vangjel Tavo me 10 pikë. Raporti i Institutit të Studimeve Politike i ka dhënë vlerësim të ulët dhe ish-Kryeministrit Sali Berisha dhe kryetares së LSI-së Monika Kryemadhi. Berisha është renditur në vendin e 109 të listës, me 18 pikë. Ndërkohë që Kryemadhi ka marrë vetëm 17 pikë.
“LLAFAZANËT” Kreu i Grupit të PS-së, Taulant Balla, është listuar në krye të tabelës së deputetëve që kanë folur më shumë në Parlament. Balla ka mbajtur në Parlament 14 fjalime individuale dhe 6 fjalime në emër të grupit të PS- së. Ndërkohë që pas tij renditet Lulzim Basha, i cili ka mbajtur 13 fjalime dhe 4 qëndrime në emër të grupit të opozitës.
Ndërkohë, të njëjtin vlerësim kanë marrë dy drejtuesit e LSI-së, Petrit Vasili dhe Luan Rama kanë mbajtur në Parlament të dy nga 11 fjalime dhe kanë folur nga 3 herë në emër të grupit. I pesti në listë është renditur Edi Rama, i cili ka mbajtur gjithsej 10 fjalime dhe 1 qëndrim në emër të socialistëve. Lista vijon me demokratët, Klevis Balliu dhe Luan Baçi, që kanë mbajtur 9 fjalime secili. Ndërkohë që 5 deputetë të tjerë, Sali Berisha, Elisa Spiropali, Evis Kushi, Romeo Gurakuqi dhe Tritan Shehu kanë mbajtur nga 8 fjalime secili.
“MEMECËT” Në raportin e publikuar nga ISP janë listuar dhe 17 deputetët “memecë”, të cilët s’e kanë hapur gojën në 7 muajt e fundit të Parlamentit. Lista kryesohet nga deputeti i LSI-së Agron Çela, i dyti socialisti Bashkim Fino, Bujar Çela i PS-së, Dritan Bici i PDIU-së. I pesti në listën e deputetëve që s’kanë folur asnjë herë në Kuvend është Ilir Ndraxhi i PS-së, Ilir Xhankolli i PS-së, Jurgis Çyrbja i PS-së dhe Luan Harusha i PS-së.
Në listë është dhe kreu i PDK-së, Nard Ndoka, i cili listohet i 9-ti pa asnjë fjalim në 7 muaj, lista vijon me Paulin Sterkajn, Reme Lalën, Robert Bitrin, Rrahman Rrahjen dhe Sadri Abazin. Në listë nuk mungon deputeti i PSD-së, Tom Doshi dhe Vangjel Tavo i Lëvizjes Socialiste për Integrim.
NDIQE LIVE "PANORAMA TV" © Panorama.al
