Kryeministri Edi Rama ka replikuar në distancë me ish-kryeministrin Sali Berisha, në lidhje me dekorimin për torturuesin e At Zef Pllumbit dhe Sami Repishtit, Shyqyri Çoku.
Në rrjetet sociale, Rama ka publikuar një dokument që tregon sipas tij se në vitet 1994 – 1995, “Sali Berisha e futi torturuesin e At Zef Pllumit dhe Sami Repishtit në listën e veteranëve të Kategorisë së Parë”.
“Ja prova se në vitet 1994 – 1995, Sali Berisha e futi torturuesin e At Zef Pllumit dhe Sami Repishtit në listën e veteranëve të Kategorisë së Parë. Në bazë të kësaj liste torturuesi në fjalë, të cilin kryeakuzatori kryefalsifikator orvatet ta përdorë për të nxitur urrejtjen e të verbërve që i shkojnë ende pas, ka gëzuar prej marsit të vitit 1995 një pension të veçantë dhe çdo nderim të bërë nga Ministria e Mbrojtjes. E cila, nga ana e vet, nuk ka pasur asnjëherë detyrën të hetojë përbërjen e kësaj liste, ashtu sikundër nuk ka pasur dhe nuk ka asnjë kompetencë ligjore për të shtuar ose hequr njeri prej listës.
Kjo është edhe arsyeja pse qeveria po përgatit një ndërhyrje në Ligjin e vitit 1994 për Statusin e Veteranit, në mënyrë që askush më tej të mos bjerë viktimë e këtij qorrsokaku, të ndërtuar nën kujdesin e veçantë të Sali Berishës si President i Republikës së Shqipërisë”, shkruan Rama në Facebook.
Sot në një deklaratë për mediat, Berisha ka akuzuar sërish Ramën se nuk ka kërkuar falje që dekoroi zyrtarët e sistemit komunist.
“Dy persona, At Zef Pllumi dhe profesori Sami Repishti që përjetuan kalvarin e tmerrshëm komunist, a nuk meritonin ata ndjesë, a nuk meritonin ata falje? A nuk meritonin ata që xhelatët e tyre të dalin nga jeta politike? A nuk meriton gruaja e Havzi Nelës ndjesë nga Edi Rama?”,- tha Berisha.
NDIQE LIVE "PANORAMA TV" © Panorama.al