Pa bërë akoma 10 vjet qëkur mori drejtimin e Partisë Socialiste, Edi Rama ka përjashtuar me firmën e tij 11 deputetë socialistë.
Në vjeshtën e vitit 2005, pasi PS-ja kishte dalë në opozitë, Rama mori drejtimin e partisë duke zëvendësuar liderin historik Fatos Nano.
Por dy vjet më vonë, në një natë të nxehtë korriku ai drejtoi grupin parlamentar në vendimin për të përjashtuar jo pak por 6 deputetë socialistë.
Taulant Dedja, Durim Hushi, Durim Lamaj, Hamit Kosta, Paulin Sterkaj dhe Bukurosh Stafa nuk do të ishin më deputetë socialistë.
Arsyeja ishte se ata, në kundështim të plotë me vendimin politik të PS-së në atë kohë, votuan pro zgjedhjes së Bamir Topit President.
Rreth katër vjet më vonë vetëm njëri prej tyre, Paulin Sterkaj, kthehet sërish në Parlament dhe të dy, bashkë me Ramën harruan atë çka kishte ndodhur në korrik 2007 duke u bashkuar sërish në PS.
Vendimi i dytë i përjashtimit në masë të deputetëve është ai përpara zgjedhjeve të vitit 2013.
Grupi socialist propozoi fillimisht shkarkimin e Kastriot Islamit dhe më pas të Gjovalin Kadelit dhe Asllan Dogjanit pasi ata u pozicionuan kundër opozitës së asaj kohe për të votuar ligjet me shumicë të cilëuar.
Vetëm një ditë përpara se të niste fushata zgjedhore e 2013, PS-ja mori vendim për të përjashtuar edhe një nga ekspertët e saj më të mirë në fushën e ekonomisë. Arben Malaj u përjashtua nga grupi dhe kryesia e PS-së pas qëndrimeve diametralisht të kundërta me Ramën.
Përjashtimi i fundit është ai i ditës së sotme kur Tom Doshi, i cili e nisi karrierën politike me PS-në, doli i pavarur, shkoi me PDK-në dhe u rikthye sërish në selinë rozë, tashmë nuk është më deputet i kësaj partie.
Deputetët e përjashtuar
Taulant Dedja
Durim Hushi
Durim Lamaj
Hamit Kosta
Paulin Sterkaj (I rikthyer)
Bukurosh Stafa
Kastriot Islami
Gjovalin Kadeli
Asllan Dogjani
Arben Malaj
Tom Doshi
NDIQE LIVE "PANORAMA TV" © Panorama.al