Sekretarja për Marrëdhëniet me Publikun e Partisë së Lirisë, Silva Caka, ka akuzuar qeverinë e kryeministrit Rama në lidhje me gjendjen ekonomike të vendit.
Përmes një deklarate për media, Caka tha se rritja e çmimeve të apartamenteve me 39-40% ka bërë që sot një shqiptari me pagë mesatare do t’i duhen 24 vite më tepër që të blejë një banesë, në raport me kohën që i duhej 7 vite më parë.
Ajo shton se çmimet e larta të apartamenteve në Tiranë lidhen me pastrimin e parasë, duke e bërë të pamundur për qytetarët që të arrijnë të blejnë një strehë të tyren.
POSTIMI I PLOTË
Deklarata e plotë e Sekretares për Marrëdhëniet me Publikun, Silva Caka
Varfërimi galopant i shqiptarëve në 10 vitet e fundit, ka thelluar në mënyrë shumë të rëndë pamundësinë e tyre për të pasur një banesë.
Sot Shqipëria për shkak vetëm të kësaj qeverisjeje, e ka kthyer banimin në një ëndërr të ndaluar për shqiptarët.
Një shqiptari me një pagë mesatare, i duhen 24 vite më tepër për blerjen e një apartamenti, në krahasim me kohën që i duhej 7 vite më parë.
Vetëm brenda një viti, në raport me vitin 2021, sipas të dhënave të vetë Bankës së Shqipërisë, çmimet e apartamenteve janë rritur me 39%.
Çmimet e apartamenteve në Tiranë janë 40% më të shtrenjta sesa në Prishtinë dhe kuptohet lehtë që qytetarëve të Prishtinës u duhen shumë më pak vite për të siguruar një banesë.
Por situata është më e rëndë se kaq, kur e krahasojmë me një vend të Bashkimit Europian, siç është Greqia, ku çmimet për m2 në Athinë janë vetëm 16% më shumë sesa në Tiranë e ku të ardhurat mesatare të qytetarëve grekë, janë më shumë sesa dyfishi i të ardhurave mesatare të qytetarëve shqiptarë.
Arsyet se pse për një qytetar shqiptar është thuajse e pamundur që të blejë një banesë, është se çmimet e apartamenteve në Tiranë, janë shumë të larta për shkak të pastrimit masiv të parasë, të mbështetur nga Qeveria.
Të gjithë i shikojnë qindra kulla dhe mijëra apartamente që kanë zaptuar qendrën e Tiranës dhe anembanë kryeqytetin, por që janë absolutisht të pamundura, që të arrihen nga qytetarët e thjeshtë;
Korrupsioni shumë i lartë ka asgjësuar zhvillimin ekonomik të vendit;
Pagat nuk rriten prej vitesh dhe as inflacioni nuk arrin të indeksohet plotësisht;
Rritja e çmimeve dhe kostove të jetesës pa i ofruar asnjë mbrojtje nga Qeveria, ka thelluar varfërinë, i ka çuar shqiptarët në kufijtë e mbijetesës dhe ia ka bërë të pamundur që ata të kursejnë për të blerë një banesë.
Për çdo shqiptar që jeton me punë të ndershme, kjo Qeveri ka vrarë çdo shpresë për të blerë një banesë, që është elementi bazë për një jetesë normale.
Për çdo familje të re, pasja e një banese është absolutisht e pamundur me këtë qeverisje që vetëm vjedh miliarda me inceneratorët, koncensionet, tenderat dhe asnjë lek nuk shkon për rritje pagash apo për të mundësuar zgjerimin e bizneseve, që sigurojnë punë të mirëpaguara.
Ka vetëm jnë zgjidhje për shqiptarët, largimin e kësaj Qeverie të korruptuar, për t’i dhënë fund varfërisë dhe për t’u siguruar shqiptarëve një jetë normale për familjet dhe fëmijët e tyre.
NDIQE LIVE "PANORAMA TV" © Panorama.al
