Pyetjet e munguara të Ramës në Këshillimin Kombëtar

Jan 27, 2022 | 8:03
SHPËRNDAJE

Nikollaq Neranxi

NIKOLLAQ NERANXI

Cili është ai mekanizëm që një qeveri vë në lëvizje kur nuk arrin të përmbushë misionin, për të cilin u votua? Është i vjetër pothuajse sa vetë politika mbi këtë planet dhe quhet populizëm, një shpëlarje truri me qëllimin e vetëm për të përligjur më pas çdo vendimmarrje, sepse “Kështu ka vendosur populli!”. Sovrani thirret në kauzë për të diskutuar për çështje të mëdha, për të cilat ekzistojnë institucionet e votëbesuara. Në fakt, demokracia dhe populizmi nuk kanë fare lidhje me njëratjetrën: e para është një sistem funksionimi përmes përfaqësimit, ndërsa e dyta është një ideologji e dështuar që në kohën e Sokratit. Populizmi e vë demokracinë në rrezik, sepse braktis popullin dhe josh turmat. Por edhe pse e tillë, Rama po e ripërdor, pasi ka thirrur këto ditë popullin përmes një pyetësori, të cilin e quan Këshillim Kombëtar. Pra, populli është sovrani që vendos nëpërmjet votës në demokraci, por zerohet në populizëm dhe as deputetët që ka zgjedhur si përfaqësuesit e tij në Parlament, nuk hyjnë në punë, sepse Kryeministri paska nevojë për këshillim “Facebook”-u!!!

Kështu, populli i rrjetit këto ditë është gjendur para pyetjeve madhore të Kryeministrit dhe përgjigjen e kërkon prej tyre.

“Si mendoni, a ta legalizojmë hashashin? Po gjobat e biznesit të madh, t’i lëmë kaq apo t’i rrisim edhe ca?”, ishin disa nga pyetjet.

I bindur se njerëzit në shumicën e rasteve janë pa formimin e duhur për të argumentuar mbi tema të tilla, Ramës i duhet një gjë tjetër, në fakt, i duhen reagimet irracionale, pasionante, pa argumente, euforike, konfuze dhe shpesh me gjuhë urrejtje e plot mllef.

Le të marrim argumentin e gjobave. Rama pyet nëse gjobat e biznesit të madh duhet të rriten nëse ai bën evazion apo janë mirë kaq? Fokusi është vënë qëllimisht te biznesi i madh, sepse gjatë gjithë kohës si Kryeministër, Rama ka synuar që njerëzit ta shohin sipërmarrësin e një biznesi të madh, si një individ të urryer, të përçmuar, prandaj dhe togfjalëshi “Gjobë dhe biznes i madh”, duhet të rrijë i skalitur në mendjet e tyre. Në fakt, Rama e di dhe e njeh mirë fuqinë e një sipërmarrësi serioz. Ajo është shumë më e madhe se e çdo qeverie dhe çdo Kryeministri, të cilët në ato karrige janë të përkohshëm. Sipërmarrësi është i vetmi, i cili vetëm me punën e tij ka arritur të bëjë atë që s’e bën dot kurrë një qeveri, sidomos një e korruptuar si kjo e Ramës. Ai punëson njerëz, paguan taksa dhe çon ekonominë përpara. Dhe, në fakt, në përgjigjet që lexova poshtë këtij argumenti në “Facebook”-un e Ramës, shumica e njerëzve ndryshe nga pritshmëritë e tij, nuk ranë në kurth. Shumica i tërhoqën vëmendjen se nuk janë problem gjobat, të mëdha apo të vogla qofshin, por njerëzit e punësuar për t’i kontrolluar ata. Administrata e Ramës është problemi! Natyrisht, kishte edhe nga ata që i çonin Ramës ujin fiks te mulliri i tij, duke komentuar se sipërmarrësit jetojnë në vila dhe kanë jahte, ndërsa populli i shkretë vuan për bukën e gojës. Një linçim publik për të vetmit njerëz idealistë, të cilët, edhe pse shohin që i drejton një qeveri e korruptuar, besojnë akoma se ky vend mund të bëhet, prandaj dhe zgjerojnë aktivitetet e tyre dhe punësojnë njerëz. Në këtë frymë populiste dhe linçimi, u fol për kontrollin e paralajmëruar, shoqëruar me kërcënime serioze për biznese, të cilat kanë një përqindje të lartë të punësuarish të deklaruar me pagën minimale. Edhe këtu kemi të bëjmë me një nxitje të jashtëzakonshme për të urryer punëdhënësit dhe për t’u thënë punonjësve se jemi ne që mendojmë për ju, jo ata që ju kanë marrë në punë. Këtu hipokrizia dhe mashtrimi kalojnë në një tjetër nivel, por për fat të keq shumë e kanë besuar si të vërtetë.

E vërteta në këtë rast ka të bëjë vetëm me nevojën e qeverisë për të mbushur arkën e zbrazur e të vjedhur të shtetit, me para të vjela nga fondi i Sigurimeve Shoqërore dhe pjesa tjetër është vetëm propagandë dhe kërcënim. Evazioni nuk kontrollohet dhe nuk zhduket duke përdorur pagën si instrument, sepse dihet që ka plot mekanizma efikase për ta mbajtur atë nën kontroll dhe shteti ato mekanizma i ka. Rama kërkon të krijojë idenë se ai është në anën e punëmarrësve, meqë ata gjakpirësit po ju mohojnë pensionin duke ju paguar në të zezë!

Por le ta marrim për një moment si një logjikë ekonomike që funksionon, atëherë si mund të përkthehet kjo në më shumë mirëqenie? Në kushtet që po jetojmë, nuk është paga minimale ajo që shkakton varfëri, por e gjithë mënyra se si funksionon sistemi ynë ekonomik. Taksat e ngritura, energjia elektrike, uji, karburanti, gazi, gjithashtu me çmime super të larta dhe të gjitha në rritje të vazhdueshme, sjellin rritje të çmimeve, me të cilat ne përballemi për ditë dhe pagat bëhen gjithnjë e më të pamjaftueshme që të përmbushin nevojat e punëmarrësve të cilët janë edhe konsumatorë. Propaganda punon fuqishëm edhe në këtë drejtim, duke rritur me ndonjë qindarkë pagat për të punësuarit në shtet, por të gjithë tashmë e dinë se nuk ka mirëqenie kur dikush të jep 10 lekë me një dorë dhe të merr 100 me dorën tjetër. Prandaj në Këshillimin kombëtar, Rama në vend të pyetjeve sensacionale, por pa asnjë vlerë për njerëzit, mund të ngrinte fare mirë probleme të cilat kanë të bëjnë ekskluzivisht me xhepat e tyre. Sepse edhe në rastin e hashashit nëse legalizohet, dihet që Rama do t’ua japë me PPP 5 miqve të tij dhe përsëri do pasurohen të njëjtit njerëz. Pra, kjo nuk do përkthehet në mirëqenie për shumicën, ashtu si në rastin e rritjes së detyrimeve apo gjobave të biznesit, sipërmarrja do vihet në vështirësi dhe do pushojë njerëz nga puna si dhe do rrisë çmimet e produkteve apo shërbimeve të tyre, pra përsëri do ketë më shumë varfëri për njerëzit.

Nuk e di se cilat do të jenë pyetjet e radhës së Kryeministrit tashmë të kthyer në një bloger, por që fasada e tij e qeverisjes me popullin, të duket pak më e kuruar, ai duhet patjetër të bëjë edhe këto pyetje:

A duhet qeveria të ulë taksat e biznesit që ai të rrisë pagat e të punësuarve?

A duhet qeveria të ulë çmimin e energjisë, gazit dhe karburantit për ju, që të keni më shumë lekë në portofolat tuaj, por edhe për biznesin që ata të ulin çmimet dhe përsëri ju të keni më shumë lekë në portofolat tuaj?

A duhet qeveria të ndalojë dhëniet me koncesion dhe PPP të pasurive publike që u përkasin të gjithëve, por që sot pasurojnë vetëm disa individë?

Sa duhet t’i rrisë qeveria pagat dhe pensionet?

A duhet qeveria të ndalojë terrorin e nxjerrjes zvarrë të njerëzve nga shtëpitë e tyre apo duhet të gjejë gjuhën e përbashkët me ta?

Pyetjet e tjera të shumta që kanë të bëjnë me problemet tuaja reale, mund t’i rendisni në komentet që bëni në faqen e Ramës.

© Panorama.al

Te lidhura