Ish fotoreporteri i “Koha Jonë”, Gent Shkullaku ka qenë në Lushnje në momentin kur ish zv.kryeministri, njëherësh kryetar i PD-së, Tritan Shehu u mor peng në qytet.
Në emisionin e mbrëmshëm “Debat në Channel One” të gazetarit Roland Qafoku, Shkullaku ka treguar edhe momentin e shkrepjes së fotos ku Shehu qëllohet me presh.
“Ishte shumë e vështirë të punoje në atë kohë. Mbaj mend që një ditë na dolën maskat. Madje në Tiranë. Ishte e tmerrshme. Por më shumë në mendje më ka mbetur marrja peng e Tritan Shehut. Sot po publikohet për herë të parë 7 fotografi nga ai moment. Duket qartë që personat e kanë marrë peng. Një prej tyre po e qëllon me presh në kokë, ndërsa unë e fotografova. Ishte një situatë e pabesueshme”, thotë Shkullaku.
