Myrto Uzuni është prezantuar ditën e sotme te skuadra kroate e Lokomotivës së Zagrebit. 23-vjeçari nga Berati, i cili shkëlqeu me fanellën e Laçit, zgjodhi të vazhdojë karrierën te Lokomotiva dhe mësohet se marrëveshja në total ka shkuar 350 mijë euro dhe do të shlyet me 2 këste.
100 mijë euro kesh në dorë kanë bindur laçianët për të lejuar Uzunin që të kalonte në Kroaci. Pjesa tjetër e shumës së transferimit pritet që të kryhet më vonë nga Klubi i Lokomotivës, i cili i ka lënë Laçit edhe 20% të vlerës së kartonit të lojtarit.
Uzuni realizoi 10 gola në kampionat me fanellën bardhezi si dhe golin e kualifikimit në raundin e parë të Ligës së Europës ndaj Anorthosis. Beratasi u largua si protagonist nga futbolli shqiptar, teksa pak ditë më parë i shënoi Skënderbeut në barazimin 1-1 në Korçë.
“Jam shumë i lumtur që erdha te Lokomotiva e Zagrebit! Kam dëgjuar shumë fjalë të mira për klubin nga ish-lojtarët shqiptarë. Kam qenë duke ndjekur klubin. E di që kjo është një marrëveshje e madhe me lojtarët e rinj. Unë falenderoj klubin për angazhim, premtoj që do të bëj më të mirën për të kontribuar në suksesin e skuadrës!”
