Presidenti i vendit Ilir Meta ka nderuar me titullin “Mjeshtër i Madh”, atletin e ndjerë Kastriot Sulçe.
Përmes një postimi në facebook, Meta shkruan se ky vlerësim për rekordmenin e njohur të atletikës shqiptare, vjen në Ditën e Rinisë, për shkak dhe të angazhimeve që ai kishte në Lëvizjen Studentore të Dhjetorit ’90.
“Sot pata kënaqësinë të nderoj me Titullin e lartë “Mjeshtër i Madh”, rekordmenin e atletikës shqiptare, të paharruarin Kastriot Sulçe.
Edhe pse për shkak të persekutimit politik dhe internimeve familjare u diskriminua dhe u privua të stërvitej, si të gjithë bashkëmoshatarët e tij, ai kurrë nuk u thye, nuk u dorëzua dhe nuk e braktisi ëndrrën për të qenë kampion duke mbetur përgjithmonë një shembull frymëzimi për më të rinjtë.
Nderimi i Tij, sot në Ditën e Rinisë, është edhe një shprehje vlerësimi për kontributin e veçantë të dhënë në Lëvizjen Studentore të Dhjetorit ’90, që përmbysi regjimin më mizor të kontinentit dhe solli Demokracinë, Lirinë dhe Pluralizmin Politik.
Falenderoj futbollistin dhe trajnerin e mirënjohur Jani Kaçi, që gjithmonë është kujdesur për të lartësuar me meritë figurën e atletit të jashtëzakonshëm, kampion kombëtar me fanellën e “Skënderbeut”, Kastriot Sulçe”, shkruan Ilir Meta.
NDIQE LIVE "PANORAMA TV" © Panorama.al
