UPDATE/ Një skemë e mashtrimit me premtime për punësimin e shtetasve shqiptarë në Rusi është zbuluar ditët e fundit nga Sektori i Hetimit të Krimit Ekonomik në Policinë e Tiranës. Ky sektor njoftoi se ka nisur procedim penal me akuzën e mashtrimit në dëm të shumë personave për katër shtetas të dyshuar, dy nga të cilët janë identifikuar.
Lulzim Hidri, 45 vjeç, dyshohet se në bashkëpunim me shtetasin 26-vjeçar Hazbi Lushi ka përfituar shuma të konsiderueshme, nga 4-5 mijë euro nga personat të cilëve u premtonte punësim në Rusi. Policia e kryeqytetit deri ditën e djeshme kishte marrë rreth 20 denoncime nga qytetarë të ndryshëm që kishin rënë pre e mashtrimit për viza pune në Rusi.
Burime të grupit të hetimit kanë pohuar dyshimet e Policisë se numri total i personave që kanë rënë pre e një skeme të tillë mund të jetë rreth 100. Personat ndaj të cilëve ka nisur procedimi penal, sipas Policisë, dyshohet se duke u premtuar punësim me kontrata dyvjeçare në Rusi, u kanë marrë shtetasve të ndryshëm shuma 4-5 mijë euro.
Ata merrnin paradhënie 1 mijë euro e më pas kërkonin pjesën tjetër me pretendimin se do të vijonin me procedurat duke plotësuar edhe disa dosje me dokumente për të rritur besueshmërinë te të dëmtuarit. Premtimi që u bëhej qytetarëve ishte se pasi të shkonin në Rusi, do të fillonin punë me pagë deri në 2500 euro në muaj në fusha si transporti dhe ndërtimi.
Denoncimet e para janë bërë në muajin dhjetor 2014, kur rreth 6 persona shkuan në Polici dhe akuzuan shtetasin Hazbi Lushi. Qytetarët denoncuan se i riu u kishte premtuar punësim gjatë Lojërave Olimpike në Sochi duke u marrë paratë e duke dërguar disa persona në Rusi, por pa u gjetur vendet e punës që kishin premtuar.
NDIQE LIVE "PANORAMA TV" © Panorama.al