Ministri i Brendshëm Fatmir Xhafaj, ishte i ftuar në emisionin “Provokacja” transmetuar mbrëmjen e sotme, ku foli mes të tjerash edhe për punën e Policisë. Xhafaj pohoi se pason një periudhë në të cilën Policia, në imazhin kolektiv, në segmente të caktuara të saj, u bë njësh me drogën.
“Nuk e përjashtoj këtë, që pati një perceptim të rënduar për Policinë në atë periudhë, deri diku e kam thënë edhe publikisht, të merituar. Për mënyrën se si u trajtua marrëdhënia e Policisë me fenomenin”, tha Xhafaj. “Por ama duhet të themi edhe një gjë tjetër, brenda harkut të dy vjetëve kemi bërë atë që nuk është mundur të bëhet për 25 vjet. Këtë fenomen të mos e kemi më prezent, jo më në ato përmasa, por në përmasa që janë të krahasueshme me të gjitha vendet e Europës dhe me shumë vende të rajonit”, shtoi.
Pjesë nga Intervista
Mustafa Nano: Mendoj se ju vini pas një periudhe ose trashëgoni një periudhë në të cilën Policia, në psikën kolektive, në imazhin kolektiv, në segmente të caktuara të saj, u bë njësh me drogën…
Ministri Xhafaj: Nuk e përjashtoj këtë, që pati një perceptim të rënduar për Policinë në atë periudhë, deri diku e kam thënë edhe publikisht, të merituar. Për mënyrën se si u trajtua marrëdhënia e Policisë me fenomenin.
Mustafa Nano: Kështu që i paguani një kosto edhe kësaj periudhe…
Ministri Xhafaj: Pa dyshim, por ama duhet të themi edhe një gjë tjetër, brenda harkut të dy vjetëve kemi bërë atë që nuk është mundur të bëhet për 25 vjet. Këtë fenomen të mos e kemi më prezent, jo më në ato përmasa, por në përmasa që janë të krahasueshme me të gjitha vendet e Europës dhe me shumë vende të rajonit!
Intervista e plotë e Ministrit të Brendshëm Fatmir Xhafaj me analistin Mustafa Nano në emisionin “Provokacija” në “ABC News”:
Mustafa Nano: Kam në studion e ‘Provokacija-s” Ministrin e Rendit z. Fatmir Xhafaj, shumë faleminderit që jeni këtu…
Ministri Xhafaj: Mirë se ju gjeta! Faleminderit, gjithashtu!
Mustafa Nano: ... i cili ka ardhur nga takime të forta dhe të nxehta politike. E pashë nëpër portale një deklaratë tuajën në parlament. Portalet e kishin nxjerrë kështu në një dritë për ta shitur si një deklaratë shumë të fortë…
Ministri Xhafaj: Normal, si shumë lajme të tjera…
Mustafa Nano: Por në fakt dukej pra që ishit i zemëruar dhe i nervozuar me faktin që jeni bërë tabelë qitjeje, target.
Ministri Xhafaj: Jo, nuk jam i zemëruar për faktin që jam në qendër të diskutimit edhe debatit politik, sepse këtë e kuptoj shumë mirë për shkak të pozicionit, rolit që kam por mund të them që nëse do t’i përmbahem asaj mënyrës se si e trajtuat ju, i zemëruar, me faktin që në vend të debatit normal politik, të alternativave, të kritikave të ndërtuara mbi argumente, synohet më shumë përbaltja e personit, e figurës së tij, sesa ajo çfarë ai bën realisht. Çfarë ai është dhe çfarë ai bën në funksionin e tij, dhe e dyta është fakti që kjo kulturë e përbaltjes, kjo kulturë e baltë-hedhjes është ngritur në institucion në politikën shqiptare. Që tregon nga njëra anë, paaftësinë për të bërë një debat të kulturuara të ngritur mbi alternativa, mbi argumente, një debat normal si në çdo vend demokratik, dhe nga ana tjetër tregon edhe një lloj konfliktualiteti ose një lloj qëllimi të keq që zëvendëson debatin e ideve, të alternativave me përbaltjen e personave. Dhe ajo që është më e rëndësishme mendoj unë, ka ardhur momenti për t’i dhënë fund kësaj dhe prokuroria ka këtu një rol të veçantë.
Mustafa Nano: Vetëm se është një praktikë që është nga të dyja palët, me thënë të drejtën…
Ministri Xhafaj: Nuk e përjashtoj që mund të ketë edhe raste, kur ne kemi qenë në opozitë, që mund të ketë pasur raste të ngjashme…
Mustafa Nano: Edhe sot, edhe dje në parlament, kjo pikëpamje e liderit të opozitës që sqaronte…
Ministri Xhafaj: Nga kjo pikëpamje unë jam një person, i cili në tërë karrierën time politike…
Mustafa Nano: Ju, jo, ok…
Ministri Xhafaj: …që nuk kam pasur qoftë edhe një rast të vetëm që të ndërtoj një akuzë false, jo më të krijoj një fakt të paqenë. Sepse kemi dy lloj deputetësh: pra një fakt që mund ta interpretosh në mënyrë, në një interes të caktuar politik, në një kontekst të shkëputur nga realiteti etj, etj; dhe kemi rastin që është rasti ekstrem, i sajimit të faktit, të akuzave në funksion të përbaltjes së tjetrit. Kjo është një diferencë shumë e madhe. Unë s’kam bërë as njërën, as tjetrën në karrierën time politike, dhe për këtë jam i lumtur.
Mustafa Nano: Ju vetë jo, për këtë dhe unë jam ndjekës i vëmendshëm i politikës shqiptare prej 20 vjetësh edhe mund ta dëshmoj dhe unë këtë gjë. Ju vetë jo, por si kulturë, është një kulturë bipartizane, e të dyja krahëve.
Ministri Xhafaj: Eshtë një kulturë prezente dhe kjo që ushqen konfliktualitetin, konfliktualiteti ushqen tensionin, tensioni ushqen edhe një lloj mungese shprese, agresiviteti, edhe tek njerëzit e thjeshtë pastaj dhe e kemi më kollaj të rëndojmë mbi ta sesa jemi ne ata që e krijojmë në fund të fundit.
Mustafa Nano: E di çfarë s’më pëlqen mua z. Ministër? Ju keni qenë aty, në parlament dhe gjatë kohës që keni qenë deputet…
Ministri Xhafaj: Jo, unë jam deputet akoma.
Mustafa Nano: Ok, ok, por gjatë kohës që keni qenë vetëm deputet…
Ministri Xhafaj: Pa funksionin e Ministrit, ok, ekzakt, po…
Mustafa Nano: Edhe opozita, edhe si të thuash, të gjithë ju kanë trajtuar me respekt, nuk është se ka pasur shumë akuza. Në momentin që ju bëheni Ministër, merrni funksion të lartë, duket sikur jeni një person tjetër! Nuk ndodh vetëm me ju!
Ministri Xhafaj: Edhe gjatë kohës që isha me reformën në drejtësi, e njëjta histori është. Për gjëra që mund t’i bënin lirshëm edhe 3-5 vjet para, edhe në formën që i bëjnë tani. Por çuditërisht, që i përdorin apo i ri-aktivizojnë apo i sajojnë në një moment që të duhet të përballen me ty. Dhe në vend që të përballen me atë çfarë je duke bërë, si përfaqësues i popullit apo si funksionar i lartë, e zëvendësojnë këtë me një lloj agresiviteti verbal duke u marrë me familjen, me jetën tënde private apo ku di unë se çfarë. Dhe kjo është e shëmtuar besoj unë, dhe ditën që ne do të shkëputemi nga kjo kulturë do të thotë që do të flasim për demokraci parlamentare.
Mustafa Nano: Ju përmendët fjalën ‘tension’ që mund të shkaktohet në publik prej kësaj klime politike. Në qoftë se Ministri i Rendit që ka të bëjë më shumë sesa të tjerët me rendit publik, me sigurinë publike, në qoftë se Ministri i Rendit do të sulmohet në këtë mënyrë. Ju mendoni që kjo përkthehet në njëfarë mënyre edhe te psika e njerëzve?
Ministri Xhafaj: Mendoj se ka efekt te njerëzit ky lloj tensioni, ky lloj debati, në mënyrë absolute. Sepse nuk i lë ata të qetë që të gjykojnë mbi punën e njërit dhe mbi qëndrimet e palës tjetër. Nga ana tjetër kjo gjë pa dyshim ndikon edhe në punë, për aq sa mund të ndikoj. Por kjo do të ishte gjysma e së keqes nëse do rrinim këtu, dhe problemin më të madh që kam unë me këtë, nuk e kam me atë çfarë bëjnë me mua, e kam me atë çfarë bëjnë me Policinë. Që ti të etiketosh një repart special që është elita e Policisë shqiptare, që në çdo moment shkon në një operacion që ka element të parë riskun për jetën, ta konsiderosh terrorist, kjo është e rëndë! Është e pafalshme, ta konsiderosh një çetë, një bandë, apo ta emërtosh “narkopolici” Policinë e Shtetit tend. Në fund të fundit janë djem dhe vajza të këtij vendi që bëjnë detyrë fisnike dhe që mbahen me taksat e qytetarëve shqiptarë. Mund të ketë ndërmjet tyre 3, 4, 5, 10 ndoshta dhe 20 që nuk e meritojnë të kenë uniformën, por ti nuk mundesh që në të njëjtin standard të vendosësh gjithë këtë trupë policore, e cila në fund të fundit ka një funksion të jashtëzakonshëm, tejet të rëndësishëm në vend.
Mustafa Nano: Mendoj se ju vini pas një periudhe ose trashëgoni një periudhë në të cilën Policia, në psikën kolektive, në imazhin kolektiv, në segmente të caktuara të saj, u bë njësh me drogën…
Ministri Xhafaj: Nuk e përjashtoj këtë, që pati një perceptim të rënduar për Policinë në atë periudhë, deri diku e kam thënë edhe publikisht, të merituar. Për mënyrën se si u trajtua marrëdhënia e Policisë me fenomenin.
Mustafa Nano: Kështu që i paguani një kosto edhe kësaj periudhe…
Ministri Xhafaj: Pa dyshim, por ama duhet të themi edhe një gjë tjetër, brenda harkut të dy vjetëve kemi bërë atë që nuk është mundur të bëhet për 25 vjet. Këtë fenomen të mos e kemi më prezent, jo më në ato përmasa, por në përmasa që janë të krahasueshme me të gjitha vendet e Europës dhe me shumë vende të rajonit!
Mustafa Nano: A mendoni ju sot, është në nivele minimale?
Ministri Xhafaj: Absolutisht po, dhe këtë nuk e them unë. Këtë e thonë ata që e monitorojnë. Sot Guardia di Finanza monitoron dy herë më shumë se vitin e kaluar, për shkak të këtij skepticizmi dhe gati 1/3 e territorit të Republikës së Shqipërisë e ka kaluar me skanim ajror. Dhe sot ne kemi shifra minimale dhe të krahasueshme me vitin e kaluar që ishte viti më i mirë. Sot Shqipëria mund të konsiderohet në mënyrë absolute si një vend që nuk është me në hartën e kultivimit të kanabisit. Sa kemi ne, rrënjë kanabisi të kultivuara dhe të asgjësuara gjatë këtij viti, mund të jenë gjetur në vendet fqinjë, në 2-3 parcela së bashku, dhe kjo nuk është një gjë e lehtë!
Mustafa Nano: Ok. Po këto që dalin ndonjëherë lajme që kapen shqiptarë me drogë, është drogë si të thuash, e stazhionuar, e vjetër?
Ministri Xhafaj: Unë, besoj që po. Absolutisht, e para njëherë se s’ka si të jetë drogë e re edhe për shkakun sepse ka një proces, por të mos harrojmë që shpesh herë fabrikohen lajme në mënyrë të posaçme që t’i vishen një realiteti të paqenë shqiptar. Psh., para disa kohësh, bëhej fjalë për një gomone, e cila ishte nisur nga Kroacia, ishte kapur në një vijë të drejtë detare, nga pala italiane, me sinjalizim të palës kroate dhe këtu “u shit” si drogë e ardhur nga Shqipëria, për shkakun e vetëm se skafistët ishin shqiptarë. Dhe sot kemi një fenomen, që një pjesë e mirë nuk nisen më nga vija jonë bregdetare. Nuk them se s’ka raste, sepse ka pasur raste të veçanta në këtë aspekt, por nisen nga Mali i Zi, nga Kroacia etj, edhe për shkak se në këto zona aktualisht kultivohet kanabis.
Mustafa Nano: Unë lexova në një shkrim të asaj periudhe, ku si të thuash droga, le të themi, u bë një ‘festival droge’ në Shqipëri, i paguajmë kostot që të gjithë ne, lexova në “Daily Mail” një lajm para 3-4 ditësh, ku thoshte që shqiptarët komandojnë një pjesë të madhe të tregtisë së drogës në një pjesë të madhe të Londrës dhe janë padronë absolutë të tregtisë. Edhe numri i shqiptarëve të burgosur në burgjet e Anglisë është në vend të tretë pas Pakistanit dhe më duket se dhe rumunëve.
Ministri Xhafaj: Tani janë dy gjëra të ndryshme, nëse flasim për kultivimin e kanabisit dhe trafikimin e tij nga territori shqiptar është një gjë tjetër, nëse flasim për përfshirjen e shqiptarëve në grupe kriminale në trafikun e drogës, drogave të forta, kjo është një gjë tjetër.
Mustafa Nano: Kjo që thashë unë tani, që iu referova, nuk ka lidhje me çfarë ka ndodhur këtu në Shqipëri.
Ministri Xhafaj: Jo, nuk ka lidhje. Ka një lidhje, që natyrisht në vite kultivimi i kanabisit ka qenë baza kryesore e fuqizimit të kriminalitetit shqiptar, që i shndërroi një pjesë të këtyre njerëzve në grupe kriminale të strukturuara.
Mustafa Nano: Kështu që ka lidhje edhe me këtë…
Ministri Xhafaj: Absolutisht, por të mos harrojmë që për gati 20 e ca vjet është kultivuar kanabis në Shqipëri në mënyrë sistematike.
Mustafa Nano: Dhe ju thoni ka marrë fund kjo periudhë?!
Ministri Xhafaj: Ju e dini që për shumë vjet kanabisi ishte, p.sh. në Lazarat e Dukagjin ishte një institucion që mbrohej nga shteti.
Mustafa Nano: Tani Shqipëria ju thoni që është derë e mbyllur?
Ministri Xhafaj: Nuk është më një fenomen i përhapur, por raste të shkëputura ka në mes të Belgjikës, Hollandës, të Londrës vetë…
Mustafa Nano: Shqipëria nuk mund të shndërrohet në një festival droge prapë?
Ministri Xhafaj: Unë besoj që së paku në këto dy vjet me ato që ne kemi bërë e kemi hequr Shqipërinë nga harta e vendeve kultivuese të kanabisit. Ky është një realitet i pakontestueshëm dhe i debatueshëm me cilindo, që mund të thotë të kundërtën apo të japë qoftë dhe një provë të vetme nga ajo që unë deklaroj këtu. Ka qenë një premtim publik që shumë njerëz nuk e kanë besuar, shqiptarë dhe ndërkombëtarë kur ne e kemi bërë në mars të vitit të kaluar, dhe sot janë detyruar të pranojnë shqiptarë dhe ndërkombëtarë dhe unë besoj shumë shpejt ata do ta thonë dhe vetë këtë gjë që, realiteti i sotëm është i pakrahasueshëm me disa vite më përpara dhe i pakrahasueshëm akoma më shumë me vite kur kanabisi ishte një institucion nën mbrojtje politike të shtetit.
Mustafa Nano: Zoti Ministër, të ndërrojmë faqe megjithëse nuk mund ta thuash që mund të ndërrohet faqja se jemi prapë këtu te puna e policisë, te puna juaj. Para dy ditësh një biznesmen me emrin Andrea Zoga, në djeninë time, unë nuk është se kam kontakte të miat personale me atë njeri; në dijeninë time ai është një biznesmen i rregullt është pjesë e biznesit normal, që respekton ligjetn, që paguan taksat, edhe u masakrua nga njerëz me maska. Kur ndodh ndonjë ngjarje në vende të ndryshme të Shqipërisë, kur përplasen banda me banda, unë vetë personalisht nuk është se kam ndonjë përjetim të veçantë, sepse nuk e di… e quaj hesape që lahen me njëri-tjetrin, midis ca njerëzve që unë nuk i kam në hesap, sido që jam i sigurt që edhe aty ka drama familjare, ka nëna, janë jetë njerëzore…
Ministri Xhafaj: Janë jetë njerëzore, sepse një pjesë e mirë edhe e tyre janë të gënjyer…
Mustafa Nano: Sigurisht, sigurisht, por e krahasuar me këtë që them unë, që ne kemi një njeri që do të bëjë një jetë normale, ka ngritur një jetë të vetën dhe disa banditë me maska e godasin, kjo jep një sinjal të keq…
Ministri Xhafaj: E para, bie dakord që është një ngjarje e rëndë, jo thjesht dhe vetëm për rastin konkret për biznesmenin për të cilin flisni, pra Andrea Zoga, por edhe për çdo qytetar, i cili është pre e një dhune të caktuar dhe është një element i cënimit të qetësisë së rendit të qetësisë që duam. Shyqyr Zotit, kemi shumë më pak se përpara. Dhe nga pikëpamja e treguesve sasiorë të kriminalitetit, këto lloj treguesish janë të pakrahasueshëm me vitet përpara, qoftë vrasjet, plagosjet, dhuna etj…, por edhe një i vetëm po të jetë, është një shqetësim. Është një shqetësim për personin konkret, për familjen, për mjedisin ku ata janë, për grupin shoqëror që i përket, dhe për opinionin në përgjithësi.
Mustafa Nano: Ka një pretendim të opozitës…
Ministri Xhafaj: Në rastin konkret qytetari, biznesmeni për të cilin flisni, i ka bërë një mesazh, pardje në mëngjes, Kryeministrit të vendit. Kryeministri ma ka përcjellë mua mesazhin dhe kam njoftuar Policinë e Shtetit, dhe një këshilltar i imi ka shkuar në spital, atje ku ishte personi i dëmtuar për t’iu gjendur në krah. Dhe njëkohësisht policia ka shkuar për t’i marrë kallëzimin; nuk kishte bërë kallëzim nga ana e tij. Pra megjithëse kishin kaluar gati 24 orë, ai nuk kishte bërë kallëzim.
Mustafa Nano: Po ndërkohë lajmi kishte dalë. Policia duhet të presë kallëzimin?
Ministri Xhafaj: Jo, Policia nuk e dinte për ngjarjen, sepse mund të ndodhë. Nuk është një mjedis që Policia mund të marrë vesh çfarë ndodh në gjithë këtë territor. Ndodhin ngjarje nga më të ndryshmet që Policia, po nuk u njoftua, nuk mund të marrë dijeni.
Mustafa Nano: Po normalisht nëse shihet një njeri të masakruar që jep intervistën në televizione?
Ministri Xhafaj: Policia shkoi përpara se ai të jepte intervistë, më vjen keq. Është komunikuar sapo ai ka dhënë këtë mesazh në telefonin e Kryeministrit. Pak minuta më pas, Policia ka shkuar për t’u njohur me rrethanat dhe për t’i marrë kallëzimin dhe për të çelur dosjen hetimore. Ka shkuar siç thashë edhe këshilltari im në spital, për t’iu gjendur pranë, për ta ndjekur çështjen nga afër dhe është duke ndjekur çështjen nga afër.
Mustafa Nano: Njerëzve tanë më shpejt i shkon mendja t’i bëjnë një letër Kryeministrit se sa të ngrenë një padi…
Ministri Xhafaj: Arsyeja që ka ndodhur kjo në fakt nuk është pikërisht për këtë gjë, por për shkak se personi kishte pasur një konflikt të mëparshëm, prokuroria e kishte pushuar çështjen. Kishte vendosur mosfillimin e çështjes penale. Dhe ai, jo shpresëplot, në mungesë të besimit të zgjidhjes së çështjes nga organet e drejtësisë, iu drejtua Kryeministrit. Normalisht do të duhej t’i drejtohej Policisë në kushte normale, por nuk do të thotë ndonjë gjë, mjaft që ai gjeti një mundësi që e trajtoi dhe ne aktualisht jemi duke hetuar për atë çështje dmth Policia.
Mustafa Nano: Ju mendoni se është nga ato çështje që autorët mund të gjenden kollaj. Kjo mund të jetë një pyetje për policët, sepse do ishte një lajm shumë i bukur nëse do të gjendeshin autorët.
Ministri Xhafaj: Është një pyetje që ja kam bërë edhe unë njerëzve të Policisë. Më kanë thënë që janë në proces hetimi. Është paksa e vështirë për shkak të kohës që ka ndodhur dhe njoftimit, por nuk është e pamundur.
Mustafa Nano: Unë e përsëris, do të ishte alamet lajmi nëse do të zbuloheshin.
Ministri Xhafaj: Sigurisht që po.
Mustafa Nano: Ju thatë që në mënyrë statistikore, si të thuash, rendi është i përmirësuar, sepse numri i krimeve, i vrasjeve është ulur, por nga ana tjetër opozita ka një pretendim që thotë: Ok, kjo mund të jetë e vërtetë, por numri i ngjarjeve të zbuluara është më i vogël se sa në kohën tonë.
Ministri Xhafaj: Është e gabuar me statistikë.
Mustafa Nano: Edhe kjo nuk qëndron thoni ju?
Ministri Xhafaj: Absolutisht jo. Jam në gjendje që t’ju jap statistika të plota për këtë gjë. Për çdo vit zbulueshmëria në mos është në të njëjtin nivel, është shumë më e mirë në çdo rast, të paktën në këto 3-4 vite. Po të doni po marrim Vlorën që ishte lideri i opozitës. Po të marrim Vlorën, opozita e quajti qytetin e krimit, nën terrorin e vrasjeve etj. Bëjmë një analizë të thjeshtë fare me statistika: nga viti 2006-2009, në 4 vjeçarin e parë të Partisë Demokratike, ishin mesatarisht në Vlorë, 9 vrasje në vit, 36 vrasje, 28 të zbuluara.
Në 4 vjeçarin e dytë, 2010-2013 mesatarisht 11 vrasje në vit, 42 vrasje, 32 të zbuluara.
Mustafa Nano: 11 vrasje në vit?
Ministri Xhafaj: Mesatarisht në një vit. Mesatarja e 4 viteve del 11 vrasje në vit. Në 2014-2017 është 32 me 22, 8 vrasje në vit, mesatarja.
Mustafa Nano: Që kjo nuk është koha juaj.
Ministri Xhafaj: Është 2014-2017, mandati i parë.
Mustafa Nano: Po nuk është koha juaj.
Ministri Xhafaj: Po, përfshi edhe 2017 që kam qenë unë. Në 2018, në Vlorë janë 6 vrasje, 5 të zbuluara. Statistikë, 6 me 5, statistika është kokëfortë. Është e vërtetë që ka ndodhur një ngjarje e dhimbshme, ajo që ndodhi në Resulaj. Janë ngjarje atipike. Janë çmendurira që nuk i llogarit dot. Nuk ka polici në botë ta mendojë që mund të ketë ngjarje të kësaj natyre.
Mustafa Nano: Cili është problemi i Policisë sipas jush? Policia është në një proces Vetting-u. Juve ju shqetësojnë më shumë policët e pa zot, në terma profesional, apo policët e korruptuar?
Ministri Xhafaj: Policët e korruptuar, absolutisht. Midis një polici shumë të aftë dhe të korruptuar dhe të një polici më pak të aftë, por të ndershëm, unë zgjedh këtë të dytin. Pa asnjë hezitim. E kam bërë këtë zgjedhje sot që flas.
Mustafa Nano: Jeni i sigurtë për këtë gjë?
Ministri Xhafaj: Jam shumë i sigurtë.
Mustafa Nano: Me një fjalë, jeni i sigurtë që kjo është më mirë?
Ministri Xhafaj: Absolutisht jam i sigurt. Jam i sigurt, sepse mungesa e integritetit tek polici është shumë e dëmshme. Së pari, për efiçencën e vetë Policisë. Për aftësinë e Policisë në kryerjen e misionit të saj. Për raportin që Policia ka me qytetatin dhe për raportin që Policia ka me krimin dhe për besueshmërinë e qytetarëve te Policia.
Mustafa Nano: Këtë e kuptoj, por një Polici të pa aftë, kriminelët mund ta tërheqin edhe prej “hunde”?
Ministri Xhafaj: Unë nuk thashë një polici të pa aftë, por midis njëri shumë të aftë dhe njëri të aftë, unë do të zgjidhja këtë që është i pa korruptuar. Nuk mund të thuash që janë të pa aftë të tjerët. Janë disa të aftë dhe të tjerët janë të paaftë. Jo, ka shumë të aftë, ka të aftë ka dhe më pak të aftë. Por unë midis këtyre të treve do të eleminoja në mënyrë absolute policin e korruptuar.
Mustafa Nano: Në fund të procesit të Vetting-ut në Polici, ju prisni që të krijohet dhe të ketë një zbrazëtirë të madhe, një vrimë të zezë? Nuk është situata e ngjashme me sistemin e Drejtësisë?
Ministri Xhafaj: Jo, jo. Edhe për shkak të numrit të madh të Policisë, numrit të madh që ka Policia. E dyta, një pjesë e vogël e tyre janë persona të implikuar ose që kanë mundësi të implikohen. Shumica e tyre janë në pozicione që nuk kanë as mundësinë praktike të implikohen në lidhje kriminale apo në afera korruptive.
Mustafa Nano: Policisë të sotme që keni ju nën komandë, nga 1 në 10…
Ministri Xhafaj: Nuk e kam unë në komandë, e ka Drejtori i Përgjithshëm i Policisë.
Mustafa Nano: Më kuptoni çfarë dua të them, teleshikuesit më kuptojnë, ju po e po. Nga 1 deri në 10, çfarë note do t’i vinit?
Ministri Xhafaj: Është e vështirë, sepse janë me fusha. E kam të vështirë t’i ndaj me nota sepse janë të ndarë edhe me sektorë, Policia Rrugore, Policia Kriminale, Policia e Rendit, është Policia Kufitare. Pra, janë fusha të ndryshme që mund të kesh vlerësime të ndryshme.
Mustafa Nano: Cili është Departamenti më i mirë i Policisë shqiptare?
Ministri Xhafaj: Nga pikëpamja e efiçencës dhe asaj që demonstron, padyshim është Rendi dhe Policia Rrugore. Ajo që unë personalisht kam pritshmëritë më të larta dhe që është investuar pak, është Policia Kriminale, dhe që duhet të bëjë ndryshim. Nëqoftëse një njeri shkon në një detyrë, unë personalisht bëj pjesë tek ata njerëz që të paktën kur shkoj në një vend pune, dua të lë një gjurmë, dua të lë diçka. Nëqoftëse sot unë bë një bilanc si Ministër i Brendshëm, çfarë bëra, punova dhe arrita të heq vendin nga harta e kultivimit të kanabisit, natyrisht është kontribut i gjithë Qeverisë, është edhe gjithë puna e Policisë, por flas për atë pjesë, për fushën që unë kam në përgjegjësi të drejtpërdrejtë. Po kështu, në këtë këndvështrim, nëse do më thonit çfarë do dëshiroje, padyshim kam 3 ambicie të afërta, dhe 1 që është pak më e vështirë, por duhet të investoj më shumë që është rasti i Policisë Kriminale. Nuk mund të ketë Polici Shteti, pa Polici Kriminale. Ajo çfarë është bërë në vite, është pikërisht zhbërja e Policisë Kriminale. Me krijimin e Task Forcës, taktikisht ishte një nga synimet e mia, për të filluar për ta ri-ngritur Policinë Kriminale. Këtë e ka dëmtuar mungesa e shkollave të policisë, e Akademisë së Sigurisë ose e Akademisë së Policisë ndër vite. Ishte një sukses që me ardhjen e kësaj Qeverie, me ardhjen e kësaj mazhorance u bë hapja e Akademisë. E ka dëmtuar lëvizjet e shpeshta pa kriter brenda Policisë, e ka dëmtuar në mënyrë të veçantë mungesa e trajnimit dhe sidomos logjistika, teknologjia, sepse është shumë i rëndësishëm ky element, dhe ne vetëm në këtë vit që jemi, kemi pasur gati rreth 10 milion dollarë, mbi gjysma e e të cilave i ka shkuar pikërisht Policisë Kriminale. Duam të bëjmë të njëjtën gjë edhe për vitin që vjen. Por ama kemi bërë një hap përpara dhe jo më larg se 2-3 vite më përpara, ishte një mungesë e hapur besimi nga Policitë e vendeve partnere, sot ne kemi arritur në një shkallë, ku unë e them me plot gojën, në një shkallë ku Policia shqiptare konsiderohet për partnerët dhe po flas këtu të paktën për disa prej tyre, konsiderohet, partneri më i besueshëm në Ballkan. Të paktën në Ballkanin perëndimor. Policia shqiptare, dhe ne sot, si asnjë Polici tjetër, kemi filluar ndërtimin e skuadrave të përbashkëta me Policinë gjermane, që do të thotë që policët shqiptarë do të hetojnë së bashku me policët gjermanë, në territorin shqiptar dhe gjerman.
Mustafa Nano: Edhe gjermanë?
Ministri Xhafaj: Po, po bashkërisht do të ngremë skuadra të përbashkëta. Do të marrim një çështje që zhvillohen njëkohësisht në disa vende, në Shqipëri, Belgjikë, Gjermani, Francë dhe do të hetojmë bashkërisht. Është nivel i lartë besimi dhe unë për këtë jam krenar sigurisht.
Mustafa Nano: Shikoni, ne jemi një nga ato pak vende që kemi prani të madhe policore në terren.
Ministri Xhafaj: Jo, nuk kemi prani të madhe policore, po për shkak të pranisë së Policisë Rrugore në rrugët e Shqipërisë, të krijon këtë perceptim.
Mustafa Nano: Shoh edhe policë të tjerë unë, jo vetëm të Rrugores!
Ministri Xhafaj: Me ata lidhet me shumë.
Mustafa Nano: Unë, kur bredh nëpër Europë, unë vetëm policë nuk shoh. Shoh çdo gjë dmth, policë jo!
Ministri Xhafaj: Kjo është e vërtetë.
Mustafa Nano: Duket sikur prania policore në terren është shenjë sigurie, por unë mendoj që është shenjë dobësie.
Ministri Xhafaj: Disa herë është e domosdoshme, në zona të caktuara, në momente tensioni duhet të ketë. Por përgjithësisht është edhe mungesë e kapaciteteve e teknologjisë që kemi. Të mos harrojmë psh që ne, një pjesë të mirë të vendit, e kemi pa elementët e survejimit me kamera etj. Ata e kanë zëvendësuar gjithë Policinë fizike, me teknologji. Atë që po duam ne të bëjmë. Shumë shpejt ne do të bëjmë publike një projekt tejet ambicioz për kushtet e Shqipërisë që e kemi emërtuar “Syri i Shqiponjës”, lidhur me vëzhgimin e territorit në Pikat e Kalimit Kufitar, në hotspot-e dmth zona urbane të nxehta dhe në të gjitha akset kryesore rrugore. Aktualisht kemi përdorimin e mjeteve teknike, kemi futur dhe dronin, por janë të pamjaftueshme.
Mustafa Nano: Në qoftë se ju do jeni ministër i Rendi deri në fund të mandatit, deri në fund të kësaj legjislature, dhe ne do takoheshim në fund të mandatit bashkë në këtë studio, ju çfarë mendoni se do kishit të reja për të më thënë ndonjë arritje?
Ministri Xhafaj: Besoj që do të kisha mundur të ndryshoja tre gjëra të rëndësishme, ose më saktë katër. E para, Policinë Kriminale…
Mustafa Nano: E paskeni merak këtë!
Ministri Xhafaj: Ajo është zemra e policisë, hetimi. Një polici që s’ka hetimin çfarë ka?
Mustafa Nano: Kjo, preket nga furtuna e ndërrimit të pushtetit, kur ndërrohen? Sepse do te ishte dramatike që ju po flisni me kaq pasion tani dhe do vijnë të tjerët dhe do ndërrohen…
Ministri Xhafaj: Shpresoj që duke vendosur regulla të qarta, do të jetë më pak e vështirë për aktorët politikë për të luajtur, dhe do ishte mirë të ndodhte kjo.
E dyta, për të pasur një menaxhim europian të sigurisë rugore, që do të thotë se pjesa e sigurisë rrugore ose menaxhimi jo thjeshtë i trafikut në një koncept më të gjerë, të jetë i standardit europian, përfshi edhe atë perceptimin fizik të policit në rrugë.
E treta, një menaxhim të standardit europian të të gjitha pikave të kalimit kufitar, dy projekte këto të cilat shumë shpejt unë do t’i bëj publike, dhe për të cilat kam marrë edhe mbështetjen e Kryeministrit, jo thjesht institucionalisht por dhe financiarisht.
Së katërti, do të dëshiroja një implementim shumë më të mirë të asaj filozofie që sapo kemi filluar së bashku me ekipin që drejtoj, ta implementojmë atë që quhet ndryshe, Policimi në Komunitet. Raporti i policit të komunitetit me banorët, me qytetarët.
Mustafa Nano: Dhe këto të katërta ju mendoni që mund t’i bëni deri në fund të legjislaturës?
Ministri Xhafaj: Kam filluar, jam ambicioz, punojmë për to intensivisht, shikoj nganjëherë edhe ëndrra për këtë gjë, por besoj që t’i bëj realitet.
Mustafa Nano: Z. Ministër, unë ju falënderoj shumë që ishit këtu në “Provokacija”.
Ministri Xhafaj: Faleminderit juve. Shpresoj dhe besoj se do vij përsëri, por do të vij për njërin nga këto projekte posaçërisht.
Mustafa Nano: Ok, unë si gazetar do përpiqem t’i ndjek në proces gjithë ato gjëra. Faleminderit!
Ministri Xhafaj: Faleminderit juve!
NDIQE LIVE "PANORAMA TV" © Panorama.al
