Policia e Shtetit deklaron se si pasojë e kontrollit në 17 pikash karburanti, janë konstatuar parregullsi në 9 subjekte, ndërsa 4 pronarë kanë rënë nën pranga. Policia deklaron se në kuadër të Operacionit për “Kontrollin cilësor, sasior e fiskal të hidrokarbureve”, që ka nisur që prej ditës së hënë nga grupet ndërinstitucionale të punës me specialistë nga Doganat, Tatimet, Drejtoria e Përgjithshme e Metrologjisë, Inspektorati Qendror Teknik, si dhe nga Policia e Shtetit , janë zhvilluar një sërë kontrollesh ndaj subjekteve private të tregtimit të karburanteve në disa qytete.
“Janë kontrolluar 17 subjekte në Tiranë, Durrës, Fier e Lezhë. Janë proceduar penalisht për fshehje të ardhurash 9 subjekte. Janë arrestuar katër pronarë të subjekteve të tregtimit të karburanteve si dhe janë shpallur në kërkim dy të tjerë. Gjithashtu nga Tatimet u bllokuan tre aktivitete tregtimi karburantesh”,-thuhet në njoftimin e policisë. Ndërsa shtohet se operacioni do vijojë edhe në ditët e ardhshme.
NDIQE LIVE "PANORAMA TV" © Panorama.al