UPDATE/ Deputeti i Shkodrës, Tom Doshi dorëzoi sot në Prokurorinë e Krimeve të Rënda kërkesën që çështja e tij të hetohet nga prokurorë ndërkombëtarë.
Kjo është hera e tretë që Doshi paraqit në Prokurorinë e Krimeve të Rënda, pas denoncimit të bërë prej tij mbi dyshimet se kryeparlamentari Ilir Meta ka paguar për vrasjen e tij dhe deputetit demokrat Mhill Fufi.
Doshi u paraqit në prokurori, me kërkesë të tij, rreth orës 10:30 të së enjtes i shoqëruar nga policë, pasi është marrë në mbrojtje. Më pas ai u largua nga porta ku hynë/dalin prokurorët dhe gjyqtarët. Dhe jo nga porta ku dhe hyri, ajo ku hynë/dalin qytetarët, mesa duket për të shmangur komentet me mediat.
Makinat që e shoqëronin e pritën deputetin nga dera lindore (hyrja e qytetarëve), pastaj lëvizen me shpejtësi dhe e morën nga dera tjetër (nga rruga e burgut ku hynë/dalin gjyqtarët e prokurorët), mësoi “Panorama Online”.
Më herët gjatë ditës së sotme, deputeti Doshi përmes një postimi në Facebook u shpreh se ngjarja nuk është sajesë dhe se është i vendosur t’i shkojë deri në fund zbardhjes së saj.
Postimi i Doshit në Facebook:
“Te dashur qytetare, Pavaresisht atyre qe do nxjerrin Iliri me Spartakun,nje gje j’u garantoj,qe kjo ngjarje nuk eshte sajese dhe porositesi eshte Ilir Meta. Zbardhjen e kesaj ceshtje do ta bej un bashke me ndihmen tuaj.
Jam i vendosur t’i shkoj deri ne fund!”, shkruante Doshi në Facebook.
