Policia ka dalë me njoftimin zyrtar për arrestimin e tre personave, të përfshirë në ngjarjen e dy ditëve më parë ku në zyrën elektorale të PD në Kavajë u plagos Bledar Okshtuni.
Kështu, policia thotë se në pranga u vunë shtetasit Ndriçim Jonuzi (Tahiri), si autor i dyshuar i plagosjes me armë zjarri të të riut demokrat si dhe shtetasit Dorjan Troplini dhe Markel Shtylla.
Ndriçim Jonuzi akuzohet për dy vepra penale, “Armëmbajtja pa leje” dhe “Plagosja e rëndë me dashje”, ndërsa dy personat e tjerë akuzohen për “Moskallëzim të krimit”.
Njoftimi i policisë
Nga specialistët për Hetimin e Krimit në Komisariatin e Policisë Kavajë u arrestuan shtetasit: N. T.(J.), 45 vjeç, për veprat penale “Armëmbajtja pa leje” dhe “Plagosja e rëndë me dashje”, dhe D. T., 29 vjeç dhe M. Sh., 29 vjeç për veprën penale “Moskallëzim i krimit”.
Këta shtetas ishin të shpallur në kërkim, pasi më datë 19.04.2021, shtetasi N. T. ka plagosur me armë zjarri në këmbë shtetasin B. O., ndërsa shtetasit D. T dhe M. Sh. nuk kanë kallëzuar për krimin.
NGJARJA
Dje, rreth orës 17:40, shtetasi i identifikuar si Ndriçim Jonuzi ose Ndriçim Tahiri, me mbiemër të ndryshuar, futet në zyrën elektorale të Partisë Demokratike në lagjen Nr. 4 dhe pas një konflikti për motive të dobëta, ka qëlluar me armë zjarri në këmbë shtetasin Bledar Okshtuni, 27 vjeç.
Shtetasi Ndriçim Jonuzi, si pasojë e një konflikti për motive të dobëta, ka hyrë në ambientet e brendshme të kësaj zyre elektorale dhe ka plagosur me armë zjarri pistoletë në këmbë shtetasin Bledar Okshtuni, 27 vjeç. Sipas policisë, mësohet se Jonuzi e ka ndjekur 27-vjeçarin derisa e ka plagosur brenda zyrës elektorale të PD-së dhe më pas është larguar i qetë nga vendi i ngjarjes.
Në një video të publikuar në media, autori i dyshuar shfaqet i qetë në momentet e para pas kryerjes së krimit, teksa del nga zyra elektorale e PD-së i pashqetësuar nga askush edhe pse vendi ishte plot me qytetarë. Ai futet në një mjet tip fuoristradë ngjyrë e zezë në vendin e pasagjerit dhe më pas largohet.
Pas tij, nga zyra elektorale del edhe i plagosuri, Bledar Okshtuni, të cilin e mbajnë në krahë dy djem të tjerë teksa e shoqërojnë drejt një mjeti ngjyrë gri për ta dërguar drejt spitalit për të marrë ndihmë mjekësore.
Forcat e Policisë kanë shkuar menjëherë në vendngjarje, ku pasi u bë këqyrja e vendit, shpalli në kërkim shtetasin Ndriçim Jonuzi ose Ndriçim Tahiri, si të dyshuar për plagosje me armë zjarri. Strukturat vendore të Policisë së Kavajës ngritën menjëherë pika kontrolli në hyrje-daljet e qytetit për kapjen e autorit.
Policia në njoftimin e saj thotë se 27-vjeçari Bledar Okshtuni u plagos me një plumb në këmbë dhe fatmirësisht, jashtë rrezikut për jetën. Grupi hetimor, nën drejtimin e Prokurorisë, vijon punën për zbardhjen e plotë të rrethanave të kësaj ngjarjeje të rëndë. Nga ana e saj, Policia ka marrë në pyetje disa dëshmitarë të cilët ndodheshin në vendngjarje në momentin që nisi konflikti që përfundoi me përdorimin e armës dhe plagosjen e 27-vjeçarit.
LEXO EDHE:
NDIQE LIVE "PANORAMA TV" © Panorama.al