Një e re shqiptare është dënuar me 7 vite burgim nga një gjykatë britanike, për përfshirje në një organizatë trafiku droge.
Sipas mediave lokale: 28-vjeçarja Marsela Kreka, e cila përdorte gjithashtu emrin Maria Danciu, u kap me 1 kilogramë kokainë në makinën e saj dhe provat e gjetura nga autoritetet britanike tregonin se ishte e përfshirë në shpërndarje droge gjatë periudhës 27 Maj 2016 deri më 2 Qershor 2016.
Më 3 Korrik të 2017-ës, ajo u shpall fajtore për akuzën e shpërndarjes së kokainës dhe atë të posedimit të një karte identiteti false. Ajo u dënua me 8 vjet burg nga gjykata Old Bailey.
Megjithatë, dënimi u zhbë më 28 Mars të këtij viti, pasi Gjykata e Apelit vendosi se shkalla e parë kishte bërë gabime në drejtimin e jurisë. Kjo erdhi pasi Kreka pretendoi se kishte qenë viktimë e trafikut njerëzor.
Por pas vendimit të Apelit, prokuroria nisi një proces të ri gjyqësor, sepse nuk u gjetën prova që të mbështesnin pretendimet e të pandehurës.
Të premten, ajo u shpall fajtore për të dyja akuzat dhe u dënua me burg nga gjykata e Ëood Green.
Adrian Flasher nga zyra e prokurorit tha se “Marsela Kreka kishte qenë pjesë e një grupi të organizuar kriminal, i përfshirë në shpërndarjen e sasive të mëdha të kokainës”.
“Pavarësisht pretendimeve të saj se kishte qenë viktimë e trafikut njerëzor, Prokuroria mundi që të tregonte se ajo nuk ishte detyruar për të kryer krimet në fjalë”.
“Zyra e Prokurorit punon ngushtë me policinë, Agjencinë Kombëtare të Krimit dhe partnerë të tjerë që të identifikojë ata që mashtrojnë duke pretenduar se janë trafikuar në mënyrë që të përballen me ligjin dhe në të njëjtën kohë për duke u siguruar se viktimat e vërteta të trafikimit të marrin mbrojtjen që u siguron ligji“, tha Flasher.
NDIQE LIVE "PANORAMA TV" © Panorama.al
