UPDATE/ Një automjet i një kompanie sigurie ka rënë pre e grabitjes nga persona të armatosur dhe të maskuar paraditen e sotme në rrugën dytësore të autostradës Tiranë-Durrës, konfirmuan burime policore për “Panorama Online”.
Ngjarja ka ndodhur rreth orës 10:00 të kësaj të hëne. Mësohet se automjeti me targë AA836JH i përkiste kompanisë së sigurisë “Oktapus” dhe po transportonte drejt bankës paratë e një firme private, e cila kishte një dyqan në QTU.
Tre autorët e kësaj grabitje dyshohet se kanë marrë mbi 500 mijë lekë. Ata më pas në ikje e sipër kanë goditur automjetin e kompanisë së sigurisë, duke bërë që punonjësit e “Oktapus” të bllokohen për disa orë në makinë, si pasojë e goditjeve në pjesën e derës.
Autorët më pas i kanë vënë flakën automjetit të tyre, një automjeti tip ‘Benz’ me targë AA862KK në Bërxullë.
Policia po punon për identifikimin dhe kapjen e tyre.
NDIQE LIVE "PANORAMA TV" © Panorama.al
