Numri i fëmijëve kosovarë që regjistrohen klasën e parë, nga viti në vit po shënon rënie. Sipas mediave vendase, krahasuar me vitin shkollor 2005/06 kur numri i nxënësve që u regjistruan në klasën e parë ishte 32 mijë, në vitin 2015/16 numri i të regjistruarve bie në 28 mijë.
Edhe në Ministrinë e Arsimit, Shkencës dhe Teknologjisë, pranojnë se ka rënie të theksuar të nxënësve që nisin shkollimin fillor. Arsye për këtë, thonë se është rënia e natalitetit dhe migrimi i familjeve nga Kosova.
Këshilltari i ministrit të arsimit, Azem Guri, thotë se po vërehet kjo rënie e theksuar e numrit të nxënësve që ulen për herë të parë në bankat e shkollës.
Arsyeja për këtë, sipas Gurit, është tashmë e ditur. Rënia e natalitetit dhe shpërngulja e kosovarëve nga vendi, janë përgjigje për numrin e nxënësve fillestarë nëpër shkolla, që po shënon ulje, thotë ai.
“Rënie e natalitetit, pastaj mund të kemi edhe zhvendosje të popullatës, lëvizje të familjeve që kanë lëvizë nga Kosova në vende të ndryshme. Në këtë periudhë 10 vjeçare, është kjo rënie e theksuar e numrit të nxënësve. Rënia e numrit të nxënësve është duke e përcjellë sistemin arsimor nga viti në vit. Çdo vit ne kemi rënie të numrit të nxënësve”, tha Guri.
NDIQE LIVE "PANORAMA TV" © Panorama.al