Prokuroria për Krimet e Rënda ka arritur të pendojë një nga tre të dyshuarit si pjesë e një grupi të angazhuar në vrasjet me pagesë dhe atentate me tritol.
Burime të organit të akuzës konfirmuan se personi që pranoi të bashkëpunojë me drejtësisë, në këmbim të sigurisë fizike dhe lehtësirave në masën e dënimit, është 24-vjeçari Kristi Pine. I riu ka zgjidhur gjuhën para hetuesve duke rrëfyer fakte për të cilat, përveç vetes së tij, inkriminonte dhe dy të dyshuarit e tjerë, Alfred Qefalia dhe Aleksandër Gora.
Sipas Prokurorisë, Qefalia dyshohet të ketë pasur rol aktiv në disa prej akteve kriminale. I dyshuari Gora mendohet të ketë dhënë ndihmesë duke u siguruar kushte për kryerjen e krimeve, duke gjetur klientë apo siguruar ndonjë porosi. Referuar rrëfimit të Pines, ai dhe dy të arrestuarit e tjerë ishin ekzekutorët në terren të urdhrave që i merrnin nga persona të tjerë.
RREFIMI
Burimeve pranë Prokurorisë thanë se Pine ka pranuar përfshirjen e tij në katër ngjarje kriminale, tri prej të cilave kundrejt pagesave të ndryshme. Bëhet fjalë për vrasjen me armë zjarri të Ibrahim Manit, vrasje e kryer bashkë me një tjetër person. Kjo vrasje ka ndodhur në qershor të vitit 2014 në Shkodër. 24- vjeçari Pine ka rrëfyer se këtë vrasje e kishte kryer në kopshtin e viktimës, teksa ai po punonte.
“E pyeta: a je ti Ibrahimi? Kur m’u përgjigj ‘po’, e qëllova menjëherë. Pak më tej më duket se ishte dhe e shoqja e tij”, mësohet të jetë shprehur Pine.
Sipas tij, këtë vrasje e kishte kryer për hatër të një mikut të tij, të cilin e kishte njohur në burg, kundrejt asnjë pagese. Kjo vrasje dyshohet të jetë kryer për motive hakmarrjeje. Para hetuesve Pine ka pranuar autorësinë e një tentative vrasjeje të dy vëllezërve Andi dhe Edmond Çakmashi, më 4 shtator 2014. Në këtë ngjarje u plagos 37-vjeçari Edmond Çakmashi nga një breshëri plumbash, që goditën makinën e tij tip “Audi” në afërsi të Shkozës, Tiranë.
Njëkohësisht i penduari Pine ka pranuar se, së bashku me të dyshuarin Alfred Qefalia, i kanë vendosur dy herë tritol biznesmenit Armando Ceka. Në ngjarjen e parë, në shtator 2013, në automjetin tip “Volvo” të Cekës ka shpërthyer një sasi tritoli, që nuk e ka lënduar. Një tentativë e dytë vrasjeje ndaj të njëjtit biznesmen u shënua më 26 shkurt 2014, pranë rrugës “Budi” në Tiranë, ku u plagos Ceka dhe dy të tjerë, njëri prej të cilëve u gjymtua. Bazuar në deklarimet e Pines, Prokuroria dyshon të arrestuarin Qefalia si autor të vendosjes së sasisë së eksplozivit në ngjarjen e rrugës “Budi”. Aktualisht Policia dhe Prokuroria po punon për mbledhjen e fakteve dhe provave që të harmonizohen me deklarimet e siguruara nga i penduari Pine.
ARMAND BAJRAMI
NDIQE LIVE "PANORAMA TV" © Panorama.al
