Partia Demokratike ka akuzuar ministrin e Drejtësisë, Saimir Tahiri për korrupsion me tenderin për uniformat e reja të policisë. Në një deklaratë për media nga selia e PD, kreu i Departamentit të Rendit dhe Sigurisë, Enkelejd Alibeaj tha se pas uniformës së re të policisë që prezantoi Tahiri, fshihet një korrupsion prej 1.1 miliardë lekësh.
Sipas tij, tenderi u bë pa transparencë dhe pa u dhënë asnjë informacion për procesin, ndërkohë që kriteret teknike u përcaktuan sipas profilit të fituesit të paracaktuar.
“Uniforma fituese u shpall nga Tahiri përpara se vendimi të botohej në fletoren zyrtare. Asnjë e dhënë kush është dizanjuesi, pse u zgjodh ai, cili komision dhe si u bë vlerësimi. Mendimi i vetë policisë, i ekspertëve nuk është marrë në konsideratë. Sipas ligjit, vetë drejtoria e Policisë duhej të kishte nisur këtë procedurë, sipas kërkesave dhe nevojave të saj” tha ai.
Sipas Alibeajt, nuk gjendet i pasqyruar askund mendimi i specialistëve të fushës për sa i përket cilësisë së veshjes, por as për emblemën e simbolet që janë vendosur.
Ai ka shtuar me tej se vetëm Saimir Tahiri e veglat e tij e dinë se kush është personi i kontraktuar.
“Një aferë e pastër korruptive, ku 1.1 miliardë lekë doroviten duke i ndarë me klientin e ministrit. Paratë e shqiptarëve trajtohen si të ishin portofoli privat i Tahirit. Ky ministër që po bën krenar shefin e tij dhe në lëmin e korrupsionit, nuk e ndjen si detyrim të respektojë ligjin dhe procedurën, as të japë llogari. Ashtu siç nuk u përgjigj edhe mbrëmë, kur publikisht në sytë e shqiptarëve u pyet në “top story” për lidhjen e tij me Emiliano Shullazin”- tha Alibeaj.
NDIQE LIVE "PANORAMA TV" © Panorama.al
