Pas prezantimit të platformës online për të denoncuar korrupsionin, Partia Demokratike denoncoi kryeministrin Edi Rama se ka larguar nga administrata zyrtarët që e kanë informuar për aktet korruptive.
Sekretarja për marrëdhëniet me publikun në PD, Grida Duma tha sot në një konferencë për shtyp se “platforma on-line për anti- korrupsionin e Edi Ramës ndoshta vlen për të shtuar shpenzimet e qeverisë por jo për të luftuar korrupsionin. Shqiptarët e kuptojnë se cdo të thotë të luftohet korrupsioni me internet e rrjete virtuale, kur kryeministri heq nga puna pikërisht ata që e denoncojnë korrupsionin”.
Ajo risolli rastin e punonjëses Luiza Gjonaj e cila informoi kryeministrin për një akt korruptiv në ministrinë e Mirëqenies, por pas disa muajsh u largua nga puna.
“Dy ligje u shkelen, ligji për nëpunësin civil, dhe ligji që nxit denoncimin e korrupsionit dhe ofron mbrojtje për denoncuesit, për të shkarkuar nga puna nëpunësen, e për të mbrojtur korrupsionin e Erion Veliajt. Kjo është e vërteta e korrupsionit në vend. Kur duhen masa konkrete, Edi Rama mbron korrupsionin dhe nxjerr në rrugë denoncuesit e tij. Ky është mesazhi për të gjithë. Nëse denonconi korrupsionin, do ta keni Edi Ramën nga pas derisa të hakmerret ndaj jush”, tha Duma.
NDIQE LIVE "PANORAMA TV" © Panorama.al
