30 Tetor, 2019

Shkaqet e zemërimit në shtatzëni dhe mënyrat se si ta menaxhoni atë


Shtatzënia është një periudhë emocionuese në jetën e çdo gruaje. Ndërsa të qenit shtatzënë mund të sjellë emocion dhe gëzim për lindjen e një fëmije, ky proces mund ta bëjë gruan më të prekshme nga ndjenjat e stresit, zemërimit, irritimit dhe ankthit. Megjithëse është krejtësisht normale të ndjeheni të zemëruar dhe të irrituar ndonjëherë gjatë shtatzënisë, zemërimi i vazhdueshëm mund të ketë pasoja të caktuara. Lidhja nënë-bebe është e tillë që bebi ndien gjithçka që përjeton nëna, përfshirë zemërimin.

Përveç kësaj, zemërimi i fshehur për një kohë të gjatë mund të sjellë depresion – ai jo vetëm që mund të ndikojë negativisht në marrëdhëniet me njerëzit, por gjithashtu të shkaktojë probleme mjekësore si presioni i lartë i gjakut, ulcerat, astma, dhimbja e kokës dhe problemet e tretjes. Kjo gjë mund të krijojë një mjedis të pasigurt për fëmijën, i cili mund të jetë i dëmshëm për shtatzëninë. Është e rëndësishme që gratë shtatzëna të qëndrojnë pozitive dhe të qeta, dhe të mos lejojnë që emocionet e ndryshme t’i mposhtin ato në çfarëdo mënyre.

Faktorët që mund të shkaktojnë zemërim ndërsa jeni shtatzënë:

Ndryshimet hormonale

Zemërimi gjatë shtatzënisë mund t’i atribuohet hormoneve luhatëse gjatë shtatzënisë. Ndryshimet hormonale gjatë kësaj kohe mund të shkaktojnë ndryshime të rregullta të humorit, ultra-ndjeshmëri dhe ndjenja të forta dhe intensive.

Stresi

Është e zakonshme të ndjeheni paksa të stresuar gjatë shtatzënisë. Kjo mund të ndodhë për shkak të disa arsyeve si shqetësimet fizike, pushimi jo i përshtatshëm, mungesa e gjumit, mbingarkesa e punës, stresi i lidhur me punën dhe shqetësimet financiare etj. Stresi i vazhdueshëm mund të ndikojë negativisht në aftësitë e menaxhimit të zemërimit të një personi dhe mund të çojë në shpërthime të inatit.

Frika

Një tjetër shkak për zemërimin gjatë shtatzënisë mund të jetë frika nga e panjohura ose e ardhmja. Gratë shtatzëna mund të kenë shqetësime në lidhje me ecurinë  e shtatzënisë së tyre, dhimbjet e lindjes, shëndetin e foshnjës së palindur ose ndonjë ndërlikim ose sëmundje të mundshme. Këto frikëra mund të jenë mjaft dërrmuese dhe zemërimi mund të bëhet një reagim i mundshëm ndaj frikërave.

Sikleti

Një sasi e caktuar e shqetësimit është e pashmangshme gjatë shtatzënisë për shkak të tranzicioneve fizike që ndodhin gjatë kësaj faze. Gratë shtatzëna normalisht përjetojnë sëmundje, përzierje dhe lodhje, ndër të tjera. Sikleti mund të çojë në nervozizëm ose emocione të forta si zemërimi i papritur,  veçanërisht nëse arsyet e shqetësimit nuk trajtohen siç duhet.

A mund të ndikojë zemërimi tek fëmija juaj i palindur?

Një grua shtatzënë që përjeton zemërim mund të ketë ndryshime të caktuara biologjike dhe fiziologjike, si rritja e presionit të gjakut dhe rrahjeve të zemrës; nivelet e hormoneve si epinefrina dhe adrenalina rriten, duke sjellë shtrëngimin e enëve të gjakut. Kjo zvogëlon furnizimin me oksigjen dhe gjak në fetus që mund të rezultojë i dëmshëm për rritjen e foshnjës. Zemërimi i zgjatur ose ekstrem gjatë shtatzënisë mund të ketë tendencën të çojë në komplikime të caktuara, madje edhe gjatë lindjes. Besohet se zemërimi i vazhdueshëm gjatë shtatzënisë ndikon tek foshnja në mënyrat e mëposhtme:

  • Pesha e ulët e lindjes
  • Lindje e parakohshme
  • Efekte jo të mira në temperamentin e foshnjës (më i prirur ndaj nervozizmit dhe depresionit)
  • Shanse më të mëdha që fëmija të jetë hiperaktiv
  • Aftësi të kufizuara njohëse.

Këshilla për të menaxhuar zemërimin

Askush nuk ju njeh më mirë se ju veten, kështu që ju mund të ndërmerrni hapat e duhur për t’u çlodhur dhe për të menaxhuar zemërimin tuaj. Këtu janë disa mënyrat se si ta menaxhoni zemërimin tuaj gjatë shtatzënisë:

  • Dietë e shëndetshme

Gjatë shtatzënisë, duhet pasur kujdes që të hani vakte të shëndetshme dhe ushqyese. Një dietë e ekuilibruar me shumë proteina dhe karbohidrate, perime me gjethe jeshile dhe fruta do të ndihmojë në ruajtjen e niveleve të energjisë dhe luftimin e lodhjes, duke sjellë një humor më të mirë.

  • Ushtrimet e rregullta

Mbani një rutinë aktive gjatë shtatzënisë duke bërë ushtrime të lehta ose shëtitje të rregullta. Qëndrimi aktiv gjatë shtatzënisë mund të stabilizojë luhatjet e humorit dhe zemërimin duke lëshuar endorfina, duke ju mbajtur në një gjendje shpirtërore të lumtur dhe pozitive.

  • Bëni aktivitetet e preferuara

Është e dobishme për gratë shtatzëna që të kënaqen me hobit që ato duan, të pushojnë ose të kalojnë kohën me miqtë e tyre, të shkojnë jashtë për të parë filma, të pikturojnë, të dëgjojnë muzikë ose të merren me kopshtari në mënyrë që të lehtësojnë stresin.

  • Meditimi

Gratë shtatzëna mund të bëjnë meditim ose yoga për të menaxhuar stresin dhe zemërimin. Këshillohet të mësoni ushtrime rreth frymëmarrjes së thellë që do të ndihmojnë në lirimin e tensionit dhe qetësimin e vetes suaj.

  • Bëni masazhe

Masazhet e buta mund të ndihmojnë gratë shtatzëna të pushojnë, si fizikisht ashtu edhe mendërisht. Përkëdhelja e vetes me trajtime spa gjithashtu mund të lehtësojë muskujt që dhembin gjatë shtatzënisë përveçse do t’ju qetësojnë mendjen.

  • Qëndroni larg debateve

Ndonjëherë është e dobishme që thjesht të shmangni një situatë të vështirë dhe të tensionuar. Nëse mendoni se jeni në prag të humbjes së durimit ose situata po bëhet shumë për t’u duruar, është mirë që thjesht të ikni larg.

  • Prioritizoni punën

Me avancimin e shtatzënisë, mund të jetë shumë e vështirë për të menaxhuar punën tuaj dhe familjen tuaj. Në një rast të tillë, caktoni përparësi në gjërat që dëshironi me të vërtetë dhe kërkoni ndihmë. Përfshini anëtarët e familjes, punësoni dikë për ndihmë ose pranoni ndihmën e kolegëve tuaj në mënyrë që të shmangni tensionimin e vetes.

  • Pushim adekuat

Pushimi i duhur dhe një gjumë i mirë gjatë natës janë thelbësore gjatë shtatzënisë. Nëse jeni të privuara nga gjumi, kjo do të çojë vetëm në nervozizëm dhe mund të sjellë edhe shpërthime zemërimi.

  • Shprehini ndjenjat tuaja.

Qoftë ekzaltimi për ardhjen e fëmijës apo edhe bezdisja nga një koleg apo dikush tjetër, nuk duhen mbajtur brenda. Kjo do të rriste nervozizmin tek ju. Besoni tek një mik ose familjar dhe tregojini ndjenjat tuaja.

  • Bëni veten prioritetin tuaj

Lumturia dhe shëndeti juaj kanë një rëndësi të madhe gjatë shtatzanisë sepse mirëqenia e foshnjës tuaj është e lidhur drejtpërdrejt me të. Merrni hapa për të siguruar që jeni fizikisht dhe emocionalisht e shëndetshme dhe rehat; vishni rroba dhe këpucë të rehatshme, bëni biseda të përzemërta me partnerin tuaj dhe ndani shqetësimet tuaja me familjen, miqtë ose doktorin tuaj.

  • Kërkoni ndihmë profesionale

Është më mirë të kërkoni ndihmën e një këshilltari ose terapisti nëse jeni duke përjetuar periudha të shpeshta zemërimi ekstrem gjatë shtatzënisë. Gjatë shtatzënisë, është e rëndësishme të siguroheni që shëndeti juaj fizik dhe mendor po shkon mirë. Përjetimi i çdo lloj stresi dhe zemërimi gjatë shtatzënisë nuk është vetëm i zakonshëm, por pritet që të ndodhë. Sidoqoftë, duhet të bëhen përpjekje për të shijuar sa më shumë këtë fazë emocionuese të jetës dhe të përqendrohemi tek lumturia për të mirëpritur një fëmijë të bukur.

 Burimi / pernenat.al

NDIQE LIVE "PANORAMA TV"
© Panoramaplus.al