6 Tetor, 2022

Rita Ora hap dyert: Brenda shtëpisë së epokës viktoriane të shqiptares në Londër


Rita Ora është mishërimi i një gruaje moderne. E lindur në Kosovë, këngëtarja shqiptare u transferua në Londrën Perëndimore kur ishte fëmijë me familjen e saj dhe prej andej, e katapultoi veten drejt famës. Sot, 31-vjeçarja ka mbi supe këngë të shumta hit; luajti në trilogjinë ’50 Shades of Grey’, ‘Detective Pikachu’ dhe filma të tjerë; dhe është shfaqur si gjyqtare dhe trajnere në talent-show si ‘The Voice UK’, ‘The Voice Australia’, ‘The X Factor’ dhe ‘The Masked Singer UK’.

Ajo është një nga ato personazhe të famshëm të shekullit të 21-të që duket se i bën të gjitha – ndjekësit e saj në Instagram e dinë se ajo ka të ngjarë të postojë nga Parisi një ditë, Los Angeles disa ditë më vonë dhe Zelanda e Re javën e ardhshme. Ajo madje ka romancën e nevojshme të profilit të lartë, me regjisorin Taika Waititi. I gjithë ky shkëlqim i jashtëm është ajo që e bën kaq të habitshme – dhe të lezetshme – që shtëpia e saj nuk është absolutisht aspak si rezidenca moderne  që mund të keni imagjinuar për të.

Në vend të kësaj, Ora banon në një banesë me tulla në lagjen Primrose Hill të Londrës Veriore. E ndërtuar në vitin 1877, dikur ishte shtëpia e ilustruesit Arthur Rackham, puna e të cilit përfshin “Alice’s Adventures in Wonderland”, “Peter Pan in Kensington Gardens”, etj. Është renditur në klasën II, që do të thotë se megjithëse Ora e rinovoi pak pasi bleu shtëpinë në vitin 2021, ajo nuk u lejua – as nuk donte – të bënte ndonjë ndryshim të madh. “Unë kam pasur gjithmonë një tërheqje për shtëpitë me një frymë të vjetër,” tha Ora për ‘Architectural digest’. “E dija se kjo shtëpi ka qenë në mënyrë specifike shtëpia e shumë krijuesve, kështu që mendova se do të kishte një energji vërtet të veçantë.”

Rinovimet konsistonin kryesisht në restaurimin e dyshemesë dhe çatisë, rinovimin e banjove, tubacioneve dhe energjisë elektrike dhe përmirësimin e kuzhinës. Në një tjetër lëvizje të thjeshtë, Ora e mobiloi shtëpinë kryesisht me gjetje të vjetra nga tregu i famshëm ‘Portobello Road’ në Londër; shumicën e artikujve që ajo kishte në pronësi dhe përdorur në shtëpitë e mëparshme. “Më pëlqen të jem me kosto efektive kur është e nevojshme,” thotë ajo. Motra dhe menaxherja e saj, Elena Ora, është përgjegjëse për rregullimin e koleksionit të mobiljeve në shtëpi, dhe stilistja e brendshme Joanna Plant ka shtuar “copëza të vogla” për të lidhur gjithçka së bashku.

Mobiljet e saj sjellin gjithashtu një shije të rrënjëve të saj nga Londra Perëndimore në lagjen e saj të re. “Bëra një përpjekje të vetëdijshme për të lënë zonën time të sigurisë,” thotë Ora për blerjen e një shtëpie në një zonë të panjohur. “Të gjithë miqtë e mi janë në Londrën Perëndimore, në kafenenë time,. Doja të zgjerohesha.” Zona e saj e re ka më shumë parqe dhe gjelbërim, dhe shtëpia e saj ka oxhaqe të shumta dhe një kopsht të bukur, të gjitha lehtësitë që e ndihmojnë atë të shkëputet më mirë nga jeta e saj me ritme të shpejta. “Unë do të ecja nëpër rrugë në Londrën Perëndimore dhe njerëzit do të thoshin, ‘Rita, çkemi?’ Dhe pastaj nuk do të kthehesha në shtëpi për gjashtë orë. Do të ulesha dhe do të pija kafe dhe më pas do të pija një pije, dhe pastaj do të thoja: “Si nuk jam ende në shtëpi?”

Flutura sociale, natyrisht, po gjen vendin e saj tani.  Ndërsa punon për albumin e saj të tretë, Ora nuk mund të ishte më e lumtur me bazën e qetë dhe të qëndrueshme të shtëpisë që ajo ka krijuar. “Të gjithë vijnë në shtëpinë time dhe më thonë: “Nuk mund ta besoj që jeton në një shtëpi si kjo,” shpjegon ajo. Ajo e kupton pse njerëzit mund të jenë të hutuar: “Nga jashtë dukem super e ndezur, plot ngjyra dhe jam vërtet krenare për vendimet që marr. Brenda, vetvetja ime e brendshme është e kundërta. Doja që vetja ime e brendshme të reflektohej në shtëpinë time.”

Hyni brenda shtëpisë së epokës viktoriane të Rita Orës në Londër:

© Panoramaplus.al