Admir Murataj i cili është personi që mbeti i vrarë dje pas shkëmbimit të zjarrit me policinë, menjëherë pas grabitjes së miliona eurove në Rinas, në bashkëpunim me persona të tjerë, nuk është një emër i panjohur as për policinë por as për publikun.
Në pretencën e Prokurorisë dhënë më 18 janar të këtij viti për bandën e akuzuar për tri grabitje të bujshme të ndodhura në autostradë gjatë transportimit të parave të bankave nga Tirana në Rinas, (si dhe një grabitje banke në Greqi), Prokurori i çështjes në total kërkoi 127 vite burg për 8 të akuzuarit, ndërsa në kërkim rezultonte Murataj.
Ngjarja e parë për të cilën akuzohet grupi, ndodhi në vitin 2015 pranë stacionit të trenit në Tiranë, ku në një bankë të nivelit të dytë u vodhën me armë 900 mijë franga, 800 mijë paund dhe 16 mijë euro. Pak muaj më vonë rreth 2 mln paund, 800 mijë dollarë dhe sasi të tjera valute u vodhën pranë kthesës së Kasharit, shkruan “Panorama”.
Ngjarja e tretë për të cilën akuzohen të pandehurit ndodhi pranë Rinasit gjatë transportimit të parave me makinën e policisë privatë, ku u rrëmbyen në automjet thasët me 2 mln e 400 mijë euro, 200 mijë dollarë dhe valuta të tjera.
Zbulimi i serisë së autorësisë së grabitjeve u bë në shkurt të 2017, ku policia dhe Prokuroria arrestuan anëtarët e bandës, të cilëve iu gjetën edhe një pjesë të shumave të vjedhura.
Kartëmonedhat ishin groposur në tenxhere, por edhe ishin fshehur në mënyrë origjinale në vende të tjera, duke u futur me qese në frigorifer.
Murataj duket se ka ditur mirë t’i investojë këto para, e një prej pasurive të tij është edhe një vilë luksoze në kodrat e Fushë-Prezës dhe një servis familjar në Vorë.
Nga një shtëpi e rrënuar që Murataj kishte blerë këtu e 10 vjet më parë, sot shtëpia e tij në Fushë-Prezë është një nga vilat më luksoze që bie menjëherë në sy. Godina është e sofistikuar jo vetëm në ndërtim, por edhe në siguri, që nga rrethimi me gardh hekuri të lartë e deri te kamerat dhe sistemet e alarmit, shkruan “Panorama”.
Duket se funksioni i saj nuk ka qenë vetëm krijimi i kushteve të rehatshme për të jetuar familja e Admir Muratajt. Kjo vilë ka pasur edhe një funksion tjetër, madje thelbësor në realizimin e dy grabitjeve të mëparshme, atë të vitit 2015 dhe 2017.
Duke qenë se është e ndërtuar në një lartësi të konsiderueshme dhe me fushëpamje shumë të qartë, nga aty janë vëzhguar me dylbi të dyja ngjarjet e ndodhura në rrugën e Rinasit pak vite më parë./ PANORAMA
(Fotot janë publikuar nga “Mapo”)
Shkrimi i botuar më 16 shkurt 2017, në PANORAMA
Një nga të kërkuarit e Policisë, Admir Murataj, që dyshohet të ketë pasur rolin e organizatorit në dy supergrabitjet, duket se e kishte përdorur mirë pjesën e parave që kishte përfituar, raporton “Panorama”.
Një vilë luksoze në kodrat e Fushë-Prezës dhe një servis familjar në Vorë janë dy prej objekteve të tij, që deri dje dyshohej se ishin ndërtuar nga paratë e fituara në emigracion. Të paktën kështu dyshonin fqinjët, të afërmit dhe ata që e njihnin.
Nga një shtëpi e rrënuar që Murataj kishte blerë këtu e 10 vjet më parë, sot shtëpia e tij në Fushë-Prezë është një nga vilat më luksoze që bie menjëherë në sy. Godina është e sofistikuar jo vetëm në ndërtim, por edhe në siguri, që nga rrethimi me gardh hekuri të lartë e deri te kamerat dhe sistemet e alarmit, shkruan “Panorama”.
Vila e Muratajt vijon të mbahet ende nën kontrollin e Policisë. Por duket se funksioni i saj nuk ka qenë vetëm krijimi i kushteve të rehatshme për të jetuar familja e Admir Muratajt. Kjo vilë ka pasur edhe një funksion tjetër, madje thelbësor në realizimin e dy grabitjeve.
Duke qenë se është e ndërtuar në një lartësi të konsiderueshme dhe me fushëpamje shumë të qartë, vila është përdorur edhe për dy grabitjet. Nga aty janë vëzhguar me dylbi të dyja ngjarjet e ndodhura në rrugën e Rinasit. Grabitja e datës 3 dhjetor 2015 dhe ajo e një jave më parë.
FAMILJA
Objekti i parë që u “sulmua” nga toka e nga ajri gjatë operacionit të dy ditëve më parë ishte vila luksoze në Fushë–Prezë, e Admir Muratajt. Tropojani, baba i 4 fëmijëve, kishte disa vite që jetonte aty.
Ndërsa të martën, kur Policia mësyu shtëpinë e tij, ai dhe familja nuk ndodheshin. I vetmi person që ndodhej brenda ishte një i afërm i Muratajt, të cilin ai e kishte porositur që të kujdesej për shtëpinë. Ndoshta i vetëdijshëm për rrezikun, vetë i zoti i shtëpisë ishte shpërngulur bashkë me familjen.
Ndonëse pas kishte lënë një pjesë të parave, që Policia i gjeti dhe i sekuestroi si provë, pasi ishin para të grabitura në dy ngjarje. Policia ka gjetur dhe ka pyetur disa nga familjarët e tij, por askush nuk ka treguar vendndodhjen, me pretendimin se nuk kanë kontaktuar prej ditësh me të.
FQINJET
Të qenët fqinj me personin që sot për sot është nga më të kërkuarit në vend, ka edhe probleme. Të paktën kështu ka ndodhur me banorët e Fushë–Prezës, me ata që i kanë shtëpitë rreth e rrotull vilës së Muratajt.
Duke qenë se ai nuk është gjetur në shtëpi, fqinjët janë detyruar të provojnë kontrollet e rrepta policore në shtëpitë e tyre, me dyshimin se ai mund të ishte fshehur në ndonjë prej tyre. Të paktë janë ata që e njohin Admir Muratajn në Fushë–Prezë.
Madje, disa nuk e kanë parë as si fytyrë, jo më ta njohin. “Ka 10 vjet që ka ardhur këtu. Bleu një shtëpi të vjetër dhe investoi miliona, duke e kthyer në këtë që është sot. Paratë, me sa dimë, i kishte fituar në emigracion, sepse di që ikte e vinte shpesh jashtë shtetit. Kohët e fundit jetonte këtu me gruan dhe 4 fëmijët. Di që është i ardhur nga veriu, por nuk e njoh shumë”, shprehet një nga fqinjët.
ETLEVA DELIA/PANORAMA
NDIQE LIVE "PANORAMA TV" © Panorama.al
