Partia Socialiste reagoi nëpërmjet sekretarit të saj për programin, Ilir Beqja menjëherë pas deklarateve të Kryeministrisë për firmosjen e vendimit nga ana e kryeministrit për rritjen e pagave.
Beqja tha se nuk ka rëndësi se sa janë rritur pagat në letër, në një kohë kur arsimtarët, mjekët, infermierët dhe punonjësit e policisë blejnë më pak se sa kanë blerë në 2005, pohim të cilin sipas tij, e mbështesin edhe statistikat zyrtare.
“Buka dhe mielli kushton 2 herë më shumë se në 2005, energjia elektrike kushton 2 herë më shumë se në 2005, uji i pijshëm kushton 2 herë më shumë se në 2005, sheqeri, vaji, orizi kushtojnë 2 herë më shumë se në 2005, barnat dhe shërbimi shëndetësor kushtojnë 2 herë më shumë se në 2005, nafta kushton 3 herë më shumë se 2005.”- theksoi Beqja.
Si pasojë e taksës së sheshtë, vazhdoi më tej Beqja, një mësues paguan 11 herë më shumë taksë.
“Në 2005 një mësues paguante taksa sa 2% e pagës, ndërsa Saliu sa 13 % të pagës. Pra, 6.5 herë më e ulët ishte shkalla tatimore në 2005, ndërsa tani edhe Saliu, edhe mësuesi, infermieri, punonjësi i policisë taksohen njësoj. Në 2005 një mësues merrte edhe pagën e 13-të, ndërsa sot edhe pagën e 12-të duhet ta paguash taksa që Bujari të ketë pallat të ri presidencial, që Saliu të rregullojë rezidencën qeveritare në Vlorë, ndërsa Ridvani të ndërrojë kolltukët e zyrës.”- tha ai.
Një Rilindje Shqiptare do të përmirësonte nivelin e jetesës së shumicës së shqiptarëve, tha zyrtari i Partisë Socialiste, pasi programi ynë do e heqë taksën e sheshtë dhe do e zëvendësoj me taksimin e ndershëm, që do të vendos drejtësinë sociale dhe do të fuqizojë shtresën e mesme.
NDIQE LIVE "PANORAMA TV" © Panorama.al
