Rreth 70 mijë konsumatorë të energjisë elektrike, familjarë dhe biznese, që janë me kontratë provizore me OSHEE-në, kanë kohë edhe 1 muaj për verifikimin e të dhënave me qëllim kthimin në kontratë përfundimtare.
Operatori i Shpërndarjes së Energjisë Elektrike shtyn edhe një muaj afatin e përditësimit të të dhënave, i parashikuar për t’u mbyllur në fund të dhjetorit. Procesi i nisur që në muajin shtator, nuk ka asnjë kosto shtesë për konsumatorët, pra kryhet pa pagesë. Konsumatorët familjarë dhe ata jofamiljarë për procesin do të vazhdojnë të plotësojnë formularin me plotësimin e të dhënave dhe dorëzimin e dokumenteve.
Në fund të muajit janar, të gjithë ata konsumatorë të cilët nuk e kanë kryer këtë proces, do të ngarkohen me kostot përkatëse që aplikon shoqëria. Pas muajit janar, kostoja për kalimin e kontratave në definitive është 14 mijë lekë për abonentët familjarë dhe 25 mijë për biznesin.
Shtyrja e afatit bëhet për shkak të fluksit të lartë të kërkesave nga abonentët. Në fillim të procesit, kompania evidentoi 100 mijë kontrata provizore, të dhënat e të cilave duhen të korrigjohen.
Aktualisht 30 për qind e tyre ka përfunduar. Abonentët familjarë përbëjnë numrin më lartë me kontrata provizore. Në ndihmë të procesit, OSHEE ka vënë në dispozicion teknikët e vet për të dhënë çdo informacion apo ndihmë.
Kontratat provizore janë grumbulluar ndër vite dhe kanë mbetur të tilla në sistem. Pas korrigjimit të të dhënave në librezë, këta abonentë do të pajisen me numrin e ri të kontratës. OSHEE i ka të ndarë abonentët me kontrata provizore, sipas qyteteve dhe në kategori familjarë dhe jofamiljarë.
SI KRYHET VERIFIKIMI I KONTRATAVE PROVIZORE
Çdo konsumator mund të kryejë verifikimin online, nëse kontrata e tij është provizore. Përmes futjes së kodit të kontratës 16-shifrore, e cila gjendet edhe te fatura e energjisë, abonentët marrin menjëherë përgjigje nëse kontrata e tyre është provizore apo përfundimtare.
Ata që konstatojnë se lidhja është provizore, duhet të plotësojnë formularin. Për biznesin, plotësimi dhe dërgimi i formularit mund të kryhet edhe online. Për abonentët familjarë, formulari i plotësuar do të dorëzohet në pikat e kujdesit të klientit. Si qytetarët, ashtu edhe biznesi, përveç formularit, duhet të plotësojnë edhe deklaratën e përgjegjësisë, si dhe të dorëzojnë disa dokumente shtesë.
EFEKTET
Sipas Operatorit të Shpërndarjes së Energjisë Elektrike, procesi synon saktësimin e të dhënave të kësaj kategorie konsumatorësh me qëllim vendosjen e një marrëdhënie kontraktore mes abonentëve dhe furnizuesit.
Me përditësimin e të dhënave, OSHEE synon evidentimin e saktë të të dhënave të abonentëve familjarë dhe biznesit me qëllim shmangien e rasteve të paqarta dhe konfuze, për shkak të pasaktësisë së këtyre të dhënave. Në fund të procesit, në sistemin e OSHEE-së do të jenë të sakta adresat e këtyre abonentëve, të dhënat për matësit, llojin e furnizimit.
Krijimi i sistemit të informacionit është pjesë e komponentëve të projektit me Bankën Botërore. Të dhënat do të shërbejnë për krijimin e një baze të dhënash. Për operatorin e shpërndarjes të energjisë, krijimi i bazës së saktë të të dhënave do të orientojë në dhënien e saktë të informacionit për konsumatorët. Nga ana tjetër, procesi shërben edhe për orientimin më me eficiencë dhe cilësi të shërbimeve ndaj abonentëve.
DORINA AZO
NDIQE LIVE "PANORAMA TV" © Panorama.al
