Orë vendimtare për Dejvi Bregun. Fantazisti vlonjat, që prej largimit nga Skënderbeu ka synuar të luajë në një ekip jashtë Shqipërisë, por nuk ka qenë e thënë që ofertat të konkretizohen. Fillimisht refuzoi një klub nga Kazakistani, duke lënë të zhgënjyer drejtuesit e Skënderbeut.
Më pas pandemia bëri që të prishej edhe akordi që klubi korçar kishte arritur me suedezët e Hamarbit për të shitur vlonjatin. Përfundimisht mesfushori u largua nga Korça me parametra zero dhe duke qenë futbollist i lirë kishte gjithçka në dorë për të zgjedhur të ardhmen.
Ashtu siç ka paralajmëruar “Panorama Sport”, pista për të shkuar në Poloni te Zaglebie Lubin u prish dhe në lojë u fut fuqishëm Teuta. Klubi durrsak i ka bërë një superofertë, teksa gazeta e ka publikuar prej ditësh që palët janë afër një marrëveshjeje. Në orët e fundit vlonjati përmes menaxherit të tij ka pritur se çfarë zhvillimesh do të ketë sa i përket një mundësie për transferim në Kroaci.
Një klub kroat interesohet konkretisht, ndërsa Teuta pret që Bregu të vijë të firmosë në Durrës. Deri në mbrëmje mund të ketë diçka konkrete. Bregu mësohet se u ka premtuar drejtuesve të Teutës, që në rast se i prishet edhe mundësia për të luajtur në Kroaci, do të vijë në Durrës, aty ku do të gjente ish-shokë skuadre si Blerim Krasniqi dhe Albano Aleksi.
PANORAMASPORT.AL
NDIQE LIVE "PANORAMA TV" © Panorama.al
