Prokuroria për Krimet e Rëenda kërkon 76 vjet burg në total për të akuzuarit e Luginës së Vilunit.
Këta shtetas akuzohen se në bashkëpunim me njëri-tjetrin kanë tentuar të trafikojnë drejt Italisë një sasi prej rreth 780 kg drogë, me pikënisje lagunën e Vilunit, në bregun e Velipojës.
Për Mikel Hoxhën u kërkuan 16 vite burg, Indrit Raja 14 vjet, Ervis Sulo 14 vjet, Kristian Çokaj 10 vjet, Leonidha Dhimijani 10 vjet , Alfred Syli 10 vjet, Mirjan Vitaj 12 vjet.
Të akuzuarit, të cilët janë hetuar teksa ndodhen në burg, në bashkëpunim me disa persona të tjerë, për të cilët hetimi po vijon, rezulton se kanë siguruar, transportuar dhe marrë masat për imbarkimin e lëndës narkotike në një skaf dhe kanë tentuar ta trafikonin drejt brigjeve të Italisë, në mbrëmjen e datës 30.09.2014.
HETIMET
Hetimet nxorën se me datë 30/09/2014 rreth orës 2100, në vendin e quajtur “Rana e Hedhun” midis Lagunës së Vilunit (Velipojë) dhe Shëngjinit, shërbimet e policisë kufitare dhe ato të Guarda di Finanza, panë të hidheshin nga një mjet lundrues, në det çanta të zeza në përmasa të mëdha.
Pasi u nxorën nga deti, rezultuan 7 të tilla. Ata kishin brenda paketime me mbështjellje natribani, gjithsej 80 (tetëdhjetë) të tilla, të cilat kishin material bimor me karakteristika të ngjashme me bimën cannabis sativa. Pesha e tyre doli 210 kg.
Duke i hequr peshën e çantave, pesha e materialit bimor doli 201.5 kg. Të nesërmen, me datë 01/10/2014 rreth orës 1200 në vendin e quajtur Grykëderdhja e Bunës në Velipojë, në një distancë rreth 4 milje detare nga bregu i detit, forcat e policisë kufitare gjetën të hedhura në det edhe 15 (pesëmbëdhjetë) çanta të tjera në ngjyrë të zezë. Edhe në këto çanta u gjetën pako me mbështjellje natribani, gjithsej 97 (nëntëdhjetë e shtatë) të tilla, të cilat kishin material bimor me karakteristika të ngjashme me bimën cannabis sativa. 97 (nëntëdhjetë e shtatë) pakot kishin peshën 594 kg. Pas zbritjes së peshës së 15 çantave, pesha e materialit bimor rezultoi 579 kg.
Nje dite pas aksionit te policise, rezultoi se makina e deputetit Mark Frroku u ndalua nga policia por ai nuk pranoi te kontrollohej pasi brenda saj ndodhej Bardhok Pllanaj, person i kërkuar për trafik droge.
Në total u gjet gjithsej 780 (shtatëqind e tetëdhjetë) kg lëndë narkotike cannabis sativa.
Ndërkohë që hetimet vijojnë për persona të tjerë, Prokuroria për Krime të Rënda dërgon për gjykim shtetasit:
– Mikel Hoxha (Ermal Mehmeti)
– Indrit Rraja
– Ervis Sulo
– Leonidha Dhimojani (Robert Abazi)
– Mirjan Vitaj
– Alfred Syli
– Kristian Çokaj
Të gjithë të akuzuar për veprën penale të “Trafikimit të Narkotikëve”, në bashkëpunim, mbetur në tentativë.
