Ministri i Shtetit për Diasporën, Pandeli Majko përsëriti ftesën e kryeministrit Edi Rama për bashkëpunim me opozitën, teksa theksoi se ajo nuk bëhet thjeshtë për një fotografi.
Në një prononcim për mediat pas konferencës “Itali dhe Shqipëri, një portë e hapur në Ballkan”, ministri Majko shprehet se në kushtet kur vendi ka pësuar tre tërmete brenda një viti është e nevojshme që politika të ndryshojë pak lëkurë, kjo për njerëzit e traumatizuar, më së shumti.
Gjithashtu Majko tha me bindje se pas tërmetit të 26 nëntorit, ajo që po bën qeveria nuk është gjëja më e zgjuar, por ajo po bën atë që mundet edhe përtej mundësive të veta financiare.
“Nuk mendoj të them që ajo që po bën qeveria është gjëja më e zgjuar që mund të bëhet në këto momente, por një gjë e them me bindje, qeveria po bën atë që mundet. Nuk bëhet thjesht për të realizuar një fotografi. Është shumë e rëndësishme edhe për njerëzit e traumatizuar që të gjitha palët sipas parimit shumë mendje janë më shumë sesa disa mendje.
Prandaj në këto kushte kur Shqipërinë e kanë goditur tre tërmete brenda një viti është e nevojshme që politika të ndryshojë pak lëkurë nëse ka mundësi. Nuk bëhet fjalë për një histori që do mbyllet brenda disa muajve do të duhet një kohë relativisht e gjatë. Do të duhen shpenzime shumë të mëdha për të tejkaluar dëmet e tre tërmeteve”, u shpreh Majko.
Konferenca “Itali dhe Shqipëri, një portë e hapur në Ballkan” nisi me një minutë heshtje në nderim të viktimave tërmetit në Shqipëri.
NDIQE LIVE "PANORAMA TV" © Panorama.al
