Superfinalja kontinentale rikthehet të luhet mbrëmjen e sotme në mitikun anglez, “Uembli”, dhe do të vërë përballë Italinë kampione Europe dhe Argjentinën kampione të Amerikës së Jugut. Edicioni i parë u zhvillua në vitin 1985, e cila pa fitues Francën përballë Uruguait, ndërkohë që të dytin e ngriti Argjentina në 1993-shin, por FIFA vendosi që ta rikthente këtë finale ndërkontinentale pas një kohe të gjatë, madje me marrëveshjen e parë mes konfederatave dhe sponsorëve deri në vitin 2028.
Në Londër mbrëmjen e sotme do të shpaloset një trofe, i cili është i ndërtuar nga çelik i presuar dhe i larë me argjend, me një peshë totale prej 8.5 kilogramësh dhe një gjatësi prej 45 centimetrash. Trofeu ka ruajtur pamjen klasike të viteve ‘80 kur u krijua, por thjesht i janë kuruar disa detaje nën firmën e Valentina Losës.
Italia dhe Argjentina do të përballen sot mes tyre për të 16-ën herë në histori. Bilanci flet për 6 fitore “Axurre”, 4 të bardhekaltërve dhe 5 barazime, ndonëse argjentinasit mund të mburren me faktin se kanë fituar tri përballjet e fundit me italianët. Suksesi i fundit i Italisë është “prehistorik”, 3-1, në Zyrih më datë 10 qershor 1987.
PANORAMASPORT.AL
NDIQE LIVE "PANORAMA TV" © Panorama.al