Një “Kuti me xixëllonja” në kujtim të Atjon Zhitit

Kutia me xixëllonja është një kuti e mbushur plot me kujtime. Çdo njëra prej tyre ndrin për t’u dhënë shpresë atyre, për të cilët ajo është më e nevojshme se kurrë.

Pikërisht kështu, “Kutia me xixëllonja” titullohet ekspozita e hapur dy ditë më parë në universitetin “Polis”, si një homazh për Atjon Zhitin, djalin e Visar dhe Eda Zhitit, që u nda nga jeta në një aksident tragjik.

Kjo ekspozitë, e kuruar nga studiuesi Gëzim Qendro, është një përzgjedhje nga vizatimet e fëmijërisë dhe të adoleshencës së Atjonit. Është një botë e gjallë, plot ngjyra që dëshmon botën e pasur shpirtërore të një fëmije që ishte gjithçka për prindërit e vet, e më pas të një të riu që ka filluar t’i hedhë vetë hapat e tij në jetë.

Nga një diell që buzëqesh e një peshk fluturues, te format abstrakte që lindnin në mendjen e të riut. Pas ndarjes së tij nga jeta, ky është rikthimi i tij i dytë, përballja e dytë me publikun, që ashtu si prindërit, edhe ai do të ketë pas ëndërruar ta bënte sa ishte në këtë jetë.

“Kutia me xixëllonja” vjen pas botimit të një përmbledhjeje të mendimeve dhe shqetësimeve të një të riu, që i kishte të gjitha premisat për t’u bërë një penë e sigurt në letrat shqipe. Tashmë kjo ekspozitë vjen si një kujtim i bukur dhe i dhimbshëm, por edhe si një mesazh për të gjithë moshatarët e tij, që ta duan dhe vlerësojnë jetën.

“Një kuti me xixëllonja. E lënë nxitimthi në ikje e sipër atë praggjëme që pikëlloi shumëkënd. E mbetur diku, gjysmë e përmbysur mbi barin e kopshtit të magjepsur të fantazisë së tij. Dhuratë për këdo. Nga Atjoni”.

NDIQE LIVE "PANORAMA TV" © Panorama.al