Nga meditimi, aktiviteti fizik dhe leximi i librave, ja disa nga aktivitetet që ju ndihmojnë ta bëni më argëtues ‘izolimin’ në shtëpi

Mar 19, 2020 | 13:34
SHPËRNDAJE

Qëndrimi në shtëpi gjatë gjithë kohës mund të duket relaksues përgjatë një fundjave por nëse kjo periudhë zgjatet më shumë, qëndrimi në shtëpi mund të bëhet stresues. Shkëputja nga jeta sociale dhe stili i zakonshëm i jetesës kërkon gjithnjë e më shumë forma të reja argëtimi alternative. Më poshtë ju rendisim disa aktivitete argëtuese të cilat mund t’i realizoni gjatë kohës që ndodheni brenda katër mureve të shtëpisë.

Mund të duket e vështirë, por mësimi i një instrumenti muzikor përveçse do ju japë kënaqësi, do ju mbajë të zënë për gjatë ditës. Kështu koha do ju kalojë më shpejt dhe ju ndërsa mësoni dicka të re dhe argëtoheni gjithashtu.

Së dyti, mund t’ju rekomandojmë të lexoni një libër. Duket si një aktivitet klishe, por që në të vërtetë nuk e praktikojmë përditë në kushte të zakonshme. Gjatë kësaj periudhe që duhet të jeni të izoluar në shtëpi, leximi i sa më shumë librave do ju bëjë të ndjeheni më mire dhe më produktivë.

Së treti, mund të merrni në konsideratë gatimin. Jo për të gjithë gatimi është pika e fortë, ndaj mund të blini një libër që mund t’ju ndihmojë me përgatitjen e recetave të ndryshme ose mund t’i gjeni ato lehtësisht në internet. Në këtë mënyrë do të kultivoni pasionin  e gatimit si dhe do të ndjeheni krenar përpara familjarëve dhe miqve tuaj.

Së katërti, ju rekomandojmë të merreni me  importimin e fotove të udhëtimit tuaj të fundit nga kamera dixhitale në kompjuter. Kështu jo vetëm që do merrni energji pozitive por njëkohësisht mund t’ju lindin ide për të planifikuar udhëtimin tuaj të rradhës.

Së pesti, mund të merrni  në konsideratë mësimin e një gjuhe të re përmes platformave online. Jo vetëm ju por së bashku me familjarët tuaj, ky mund të jetë një aktivitet sa i bukur aq edhe frytdhënës.

Së gjashti, për të gjithë ata që thjesht duan të relaksohen dhe nuk duan të merren me gjëra të reja, qëndrimi përpara televizorit për të parë filma, seriale apo dokumentarë është zgjedhja perfekte.

Zgjidhja e shtatë, shkon për të gjitha vajzat dhe gratë që e kanë lënë pas dore garderobën e tyre. Gjatë kësaj kohe që do jeni në shtëpi mund të organizoni veshjet tuaja duke i seleksionuar ato që ju duhen nga ato që nuk ju hyjnë më në punë.

Dhe së fundmi, ju rekomandojmë meditimin dhe aktivitetin fizik në shtëpi. Të merreni pak me mendjen dhe trupin tuaj nuk është asnjëherë e tepërt.

Burimi / http://www.scan-tv.com/

NDIQE LIVE "PANORAMA TV" © Panorama.al

Te lidhura